Antonia Verocai Zardini

Antonia Verocai Zardini nasc del 1876 a Cortina, la marida l fotograf Raffaele Zardini e la se arvejina a l’èrt de la fotografia. Al scomenz del Nefcent sie prumes retrac tol ju momenc de comunanza e i turisć che rua a descorir la zitadina ampezèna.

Del 1909 ge vegn entitolà la lizenza del atelier fotografich “Foto Zardini” olache vegn fat retrac su comiscion. Del 1914 crepa fora la Gran Vera: sie om vegn internà a Katzenau de mé del 1915 e la resta soula a cef de la firma e de la familia.

La fotografa i momenc de vera te Ampez: la tol ju i acampamenc e la vita da vigni dì, la femenes e i bec resté te paisc e la sepoltures, ence chela del gen. Cantore copà su la Tofanes. Te sie archif l é ence prejonieres e trincees, la linees de defendura talièna su la Cinch Torns, l bombardament dai 14 de messèl del 1916 e l gran fech dai 4 de otober del 1916. Con coraje la documentea de sconet da na fenestra de cèsa sia la pruma patulies taliènes che rua te paisc. Sie retrac conta de n temp cruent e de gran dolor. Te sie atelier la svilupa sia lastres de vierech e cheles che ge porta i sudé, la se emprevèl de na machina stereoscopica e de doi cambra scures. Do che sie om vegn de outa del 1917 e fenesc l conflit, la seghita con sia profescion, fajan crescer l atelier e ence endèna l secont gran conflit la regoi trop materièl.

La mor del 1951: sie fies va inant con l’atività de familia e amò anchecondì sie nez Stefano laora desche fotoreporter.