L’èga da mont la conta...

Este amò stat sun Antermoa? Aló son bela, bruna e giacèda.

Oe! Oe! Me senteste? Tu che te te n vès pian pian sa mont... èste mìngol de temp per me scutèr? Sentete jù su chela zopa, paussa e... scouta.

Gé son l’èga de chest picol ruf, vèrda coche son chièra. Met ite na man, sent coche son frescia.

Vegne fora de sot tera sa mont te anter i sasc, penamai che veide l lumenous me vèrde dintorn e reste encantèda dedant al ciel brun, la crepes e l bosch! L soreie l’é maraveous, l’é mie morojo, l me fèsc sgalizèr desche na reìna.

Aló da mia fontèna l’é semper de bie fiores, chi śai dal smauz, e vegn ence de bon crescion, l beca mìngol ma l’é zis bon da concèr jù co la salata.

Vegnir da mont ju me sà dalbon n muie bel, me gode n mondo, me la ciante, fae ciampilotes soraite i sasc, strosee e dorje per tor fora i perons massa gregn!

Èste mai osservà na mia sclitèda canche la roba n rai de soreie? L’à i colores de l’ercabuan!! L’é n encant!

Me sà bel jir de sbalz, trèr sauc, corer asvelta per mont e per val... peissete che rue enscin al mèr!

Canche passe te n ruf chiet sul pèscol, vegn la vaces a se dabirèr, vèrde de fèr n picol poz coscita les se spieia ite. Emben enlouta me la grigne de gust... te vedesses che musc e che fices che les fèsc!

N’outa l’era ence pèstres, ic e eles. Che bel canche passèe enlèngia na tieja da mont e sentìe sonèr l’orghin da mantech, i balèa, i ciantèa e i fajea l jodler, me n jìe piena de legreza e voa de viver.

Zis bel me sa me n stèr ti leghes da mont! Èste mai vedù l lech de la Tomera? Ben canche no l’é chel móstrigno del vent, me n stae ceta ceta, fae da spieie al bosch e a la crepes del Latemar! Te saesse cotenc retrac che fèsc la jent... e l’é dut merit mie!!

Cajù l’é n picol pent de legn, l’é semper n veiat che me speta, l me vèrda encantà...

Este amò stat sun Antermoa? Aló son bela, bruna e giacèda, dut un l’é semper vèlch ardì che se peta tel lech, gé me gode percheche ge resta fora l fià dal freit!

E sa l Gartl? D’aisciuda canche la neif se delega, fae n bel lech e me gode la veduda maraveousa de la Torns del Vaiolet, les me à ciapà via l cher!

Ades vae inant con mie viac ma tu no te n jir, scouta amò!

Cajù l’é n picol pent de legn, l’é semper n veiat che me speta, l me vèrda encantà, ge recorde canche l’era jon, l beea co la mans, l se smoèa l mus e l grignèa bel content. Vèlch outa ge sluzia jù na legrema, gé me la tole, la tegne strenta e l’é desche aer n picol toch sie cher.

Canche son te paìsc n muie de outes rue te n festil. Te saesses che curious che l’era n’outa. La femenes vegnìa a lavèr... che batolament: les ciacolèa, les grignèa e vèlch outa les rufianèa. Gé scutèe e dapò grignotan me n jìe.

A vegnir da mont ju l’é dut na scassèda, vèlch outa cogne sutèr ju per la crepes, sèste che bel che me sà, fae pisciadoes da marevea! Sunsom me arcedee, me scatornee, sclite daperdut, fae scaoz e dapò con ardiment me pete ju per la crepa e... sgole!

Ades te die vèlch sotousc, l pisciadoi l’é n post encantesimà, l ge sà bel ai moroji, i rua tant vejin che i smoe desche ponjins. No i se cruzia de nia, i se tegn per man, i se vèrda ti eies e i se bossa endèna che gé soraìte co la sclites ge fae n ercabuan! Che douces che i é!

Canche é fenì de sbondernèr daperdut sa mont rue te val e aló posse mìngol me pussèr. Me slèrie fora te la Veisc, me n vae più pian, passe fora per i paìjes, veide la cèses, la gejies e la jent.

Son più chieta, vèrde de no fèr ac e me la ciante sotousc.

Vèlch outa cogne sutèr ju per la crepes, sèste che bel che me sà, fae pisciadoes da marevea!

Su la spones de ruf l’é semper zachei che se ferma e me scouta. Se l’é picoi te bagherle ciante sot ousc na naina lijiera che conta de ciel, de nigoles desche bata e rosèda lijiera che fèsc sgalizèr i fiores. Conte de zeberchies che tira sauc sorafora i ruves da mont, de vivènes che stèsc a soreie sui sasc te mez ai leghes da mont, de salvans e stries che no i me pel aer, perché no i vel se lavèr.

Conte de schieratoles curiouses, montagnoles che fèsc da mat, caprioi zevii e spevies, cerves maestousc, ègues reìnes del ciel, picoi ucìe che se bagna l bech e ence la piumes... L’é ben ence la bisces che vegn a beiver, ma cheles me fèsc aric. Me n grigne su schenes enveze co la rènes e i rosches, te sentisses che ac e che versc! Canche son stufa d’i sentir vae a veder de la trotes, cheles amàncol fèsc acort e coscita me pausse la ureies.

Bel me sà canche son chieta ti leghes da mont e rua bec, i peta ite sasc, gé me gode, sclite, saute su e dapò fae n grumon de cerchies che chisc picoi vèrda con eies maraveé.

Cogne ben dir che vèlch outa dovente cativa. D’aisciuda e d’uton canche l pief massa empienesce i ruves, ciape gran forza, dovente na furia, fae ac, dessatee dut chel che me fera e me tole dò dut chel che troe. Magne fora la spones di ruves, mene ju mauta, piantes, orcena, roine strèdes e se troe n pent massa bas passe sorafora. Meve via metes e bisciaboes, vae per sora, rue te la cèses, fae dans e vèlch outa ence morc. Enlouta i omin i à poura.

D’invern enveze me sà bel, giace mia fontèna demò soraìte e passe sotite la giacia grugolan! Canche l’é gregn fredons fae vamp e i omin disc che boe, me vegn da grignèr! Peissa se la femenes vegnissa a chejer pasta te ruf canche boe dal freit!

Sèste che son ence bona de recamèr? Canche l’é n freit tumech osserva che bie bechec che fae su la vischies, sui peces e sui festuc, l’é mia picola goces che doventa broja sgalizenta, n encant. No pa per me la blaghèr, ma son ence mìngol artista, fae fiores de giacia sui pions de festil, dapò coi raes del soreie i fae lujer de duc i colores.

Peissete che son ence bona de balèr! Abada canche l fioca, dovente n fioch balarin, sgole, routole, śire, fae ciampilotes e a la fin con gran grazia me poje ja bas. L’é l bal de la neif!!

Speta no te n jir... Te conte ence chesta.

Mie pisciadoes d’invern doventa giacions, enlouta rua i rampeadores, i à piches, pergais e cherpeles, i se rampeea su per mia giacia desche schieratoles! I fèsc vegnir i sgrices ju per la schena!

Te chisc ùltimes egn son cruzièda percheche i omin i é dò che i entesseea l mondo e i giacees se delega. La tera é dò a se sciudèr, l fioca semper de manco e l tempram se auza. Èste vedù co che l se à tirà n su l mantel bianch de la Marmolèda? Me strenc l cher, l’era dalbon n muie bel! Canche no sarà più giacees no sarà più èga da beiver e zenza èga no l’é vita.

D’invern enveze me sà bel, giace mia fontèna demò soraìte e passe sotite la giacia grugolan!

Gé son l ben più prezious per duta la creatures de la tera, nesciugn pel fèr condemanco de me, gé son la vita per omin, piantes e besties! Zenza de me nesciugn pel viver e son preziousa ence per l lurier. Te duc i mestieres l’om doura l’èga. N’outa l’era n muie de molins, i me fajea jir fora per na salaa, cognee fèr jir na roda da pèles che dapò fajea jir la moles. I majenèa l forment che doventèa bona farina per fèr pan. L’invenzion de l’eletrich l’é stat vèlch da gran, l’om l’é stat bon con sie cef de me fèr doventèr lum! Te saesses che gran sodesfazion che l’é stat per me canche del 1921 i à enlumenà per la pruma outa da Maitin la Pief de Sèn Jan, siere dalbon stolza.

Te mie viac troe ben ence gran desgrazies desche chela del fech! Me vegn la legremes a pissèr che no son stata bona de dèr na man a destudèr l fech che à brujà Ciampedel del 1817, Grìes del 1912 e Vich del 1921, tanta families restèdes zenza nia, me strenc l cher amò aldidanché!

Ades cogne me n jir do mia strèda, l mèr me speta, te vedesse che gran che l’é, no l’à spones, no te veides olache l fenesc. Ben, tel mèr fae de bela ones, me auze en pe descheche fèsc i ciavai, dapò coran me pete ju sul saolon, l’é desche n bel jech che va roda a dò a dò.

Te conte amò l’ùltima.

Canche rue tel mèr vive doi moments maraveousc, l’èlba e canche fior soreie. Dadoman bonora somea che l soreie vegne fora da l’èga, l fèsc sgalizèr l mèr, l porta lum e ciaut a la tera. Da sera l soreie doventa desche na bala de fech, somea che l se pete tel mèr e l’entenc de ros. L’é na marevea de la natura!

Ence gé desche l soreie anché me n vae, ma doman vegne de retorn e se l pief no te enirèr. Son semper gé, che scomenze da nef chest mie bel viac per dèr vita a duta la creatures!

Ades cogne dalbon te saludèr, stà ben, rencurete, vèrdeme via e detelpai de me aer scutà!

Annelise Vian, La Usc 30 del 2019