Canche un bechet s’imbat te n gramièl

I bechec de na ciameija, vèlch outa (desche tel retrat) massa gregn.

D’uton e d’aisciuda se se marida

L meis de setember, desche chel de mé, l’é meisc da se maridèr, inchecondì. Zacan se se maridèa da Carnascèr, donca d’invern via, che inlouta se podea fèr dededut, ence per la gejia! Per chest me é pissà de ge dedichèr chesta rubrica al gramièl da bechet bianch.

Bechet

I bechec (te de autra valèdes ladines: i zandli) zacan l’era vèlch de prezious. Logisc che dutcant vegnìa fat a man. Bechet, chel a àcherle, chel de Sèn Gal…n’era e n’é de ogne sort. Canche se peissa a n bechet tel guant da zacan se peissa fazilmenter a chel che fornesc la mègnes de la ciameija o chi pìcui che fornesc un barel o un davantin, un colar. Vèlch outa noscia ciameijes da Fascèna les à zeche bechec dintorn la mègnes ence massa gregn per noscia tradizion!

L’artejanat, la produzion de bechet

Chel artejanat de produzion de bechet, l’é béleche un’èrt e la va indò fin del Renasciment, apontin l prum bechet nasc del XV secul e l’é timpruma resservà demò ai omin. La femenes taca a poder l trèr cà dal XVII secol inant. L se trata de ingatièr i fii fincanche vegn fora na roba lijiera e preziosa da mac. Chest lurier no l vegn fat donca sun na teila, ma l’é n insema de treces de fii a vet, dijesse. A fèr chest se doura sessaben n dessegn e dapodò i struments aldò per lurèr.

Se inchecondì ne sà sorì ciapèr mingol de bechet desche roba da brac, desche teila per fèr n guant, o n gramièl, te nosc cajo, zacan no l’era coscita segur de no vé, donca l gramièl da bechet te la tradizion fascèna del guant da zacan l’à tras n gran valor simbolich e prezious!

La sposa fascèna e l gramièl da bechet bianch

La sposa fascèna col guant »a la fascèna« (gramièl e fazolet de seida) no se regola mai de bianch, ma l’arà n complet de gramiel e fazolet de seida n muie rich e dut in dut la sarà fornida sù desche na prinzessa, sessaben tras aldò del tacuin de la familia de la sposa! La sposa fascèna col guant »a l’antica« l’é dut auter. Se pel dir che l gramièl de bechet bianch l’é vèlch che te dut l Tirol e foravìa l’é simbol de pureza e joventù. Te Fascia inchecondì ja la Val de Sot amò col guant dit »a la nazionale« se se tira ite n bel gramièl da bechet bianch.

I bechec Chantilly per n gramièl da sposa.

Sa la Val de Sora l’é più in doura l gramièl de laneta che chel de bechet e chest ence per la jones. Dutun podesse dir che l gramièl bianch, se se tol bechet che sie bechet, l’é pa dassen vèlch da prezious e bel e da tegnir cont.

Ja la Val de Sot é vedù ence femenes de na età se trèr ite sie guant a la nazionale de canche les era touses, col gramièl da bechet bianch, e fèr amò l bref. A se maridèr col guant a l’antica la sposa pel cerder n gramièl da bechet bianch. Gé conseie l più lijier bechet al mond; l bechet de Chantilly, l vegn da la Franzia e posse dassen dir che l’é l più bel bechet al mond. Vèlch outa desche gramièl bianch da bechet ence te guants de autra valèdes se veit zeche roba da coltrines, neto da spaent! Sposes, se volede aer n bel gramièl che sapie da vèlch, spené mìngol, che l’é chel che ve fornesc!

L gramiel bianch tel guant »a la fascèna«

L gramièl bianch ence tel guant a la fascèna desche utró tel Tirol l fossa simbol de verginità o amàncol, joneza. La femenes de età, sessaben, les pel se trèr ite n bel gramièl da bechet se les serf da magnèr e da beiver. Per la fascènes col guant »a la fascèna« l’é ence vèlch autra ocajion per se trèr ite n gramièl da bechet, n bechet de Sèn Gal, n bechet de teila Svizra per portèr la Madona o ence col guant da »ostessa« descheche à la marcaténderes vèlch outa.

L gramièl de teila da bechet se l porta con n fazolet de lèna o bombèsc desche da ostessa e inveze a portèr la Madona con n bel fazolet boemo brun!

Ve conseie bele n gramièl de teila bele scempie se ède da servir sgnapes o de auter, ajache l’é pecià n bel gramièl de bechet cèr e ciaredous e dapodò se l ruinèr con n cuch de ègadevita!

ClaudiaConta, La Usc di Ladins 38 del 2018