L’aisciuda… da corona: na garlanda de bechec

La ciameija del guant da Moena la é bela rica de bechec dintornvìa.

Stèr te stua d’aisciuda, a fèr bechec

Se chi cogn stèr te stua da la bona sajon, stèr te stua d’aisciuda… apontin mai sozedù, l’é belebon per nos fémenes se chi èssa n gran gust de fèr lurieres a man. Lurèr a àcherle per fèr bechec da ciameijes da jir col guant l’é vèlch che se pel fèr sun canapé te stua, dedant a la televijion, sun poel a soreie o ence sun banch dedant majon.

Soraldut la ciameija che se tol cà a jir col guant da Moena la é rica da bechec, indò desvaliva, indò n’autra foja e n’autra moda da chela che se tol a jir col guant a l’antica o a la fascèna.

Chest no pa percheche zachei èssa volù se desferenzièr atruz, ma sessaben che ogne guant à sia carateristica e donca ence l model de la ciameija ge va dò al tai del guant.

Più avisa ja Moena

Apontin la ciameija da Moena la é bela rica de bechec dintornvìa l col e ence forinsom la mènies. La mènies de la ciameija les é n paradis de infizadura e sbof. L tai ge dèsc na eleganza al brac che va sorafora de autra ciameijes.

L particolèr de la ciameija da Moena che me sà più da uzèr fora l’é la infizadura su la mènia, mìngol spostèda, no pa apontin su la spala, n goc più bassa. Chest particolèr ge dèsc na bela foja a la infizadura de la mènia e la stèsc sessaben giusta benon col tai de la bostina.

La infizadura su la mènia, particolèr de la ciameija da Moena.

Garlanda da bechet dintornvia l col

Cauja che l spalarin (a chel che su per Fascia ge dijon barel) ja Moena no l’à bechet tacà laìte, la ciameija la é rica de bechet dintornvia l col e l’à n belot pìcol col metù in pe.

L bechet coscita ence l stèsc su bel in pe o foraldret coche se vel dir, bel incolà se l’é meso. Chest a gran desferenzia de la ciameija da se trèr ite col guant a la fascèna, te Fascia, che sessaben la é zenza col, e no l’à debesegn de esser fornida su ajache se veit demò la mènies, dut l rest l’é sconet da la bostina che se ciola su bel fin sotite l col.

Lurèr a àcherle te tempes de corona

La ciameija de bechet l’à n belot pìcol col metù in pe.

I bechec per dintornvìa l col i pel esser na striscia da poder infizèr o senó n mez toron da poder infizèr. Valif per i bechec dintornvia la mènies. Se lurède in mez toron, i bechec i stèsc miec, i é più bie, i stèsc fora più bel e no serf i incolèr.

L dessegn l’é unfat, podede cerder chel che volede e ve desveneèr, ve goder a in fèr na cesta e n ceston, che de chisc tempes… »temp l’é temp e carantan«, ma del prum, sin à da vener, del secondo per chest an e chel che vegn, l a veide grieva.

E te nesc tempes modergn vardon de no targetisèr n lurier »da femena« e »da om«, no l’é pa dit che l lurier a àcherle sibie demò da fémenes, se ède gust, cari bec e fenc, perche pa no?

Bon lurier!

ClaudiaConta, Te armer de la Conta, La Usc 17 del 2020