Ladinia, tera de schi e de gran campions

Per n muie de temp, ti prumes dejenees del Nefcent, l turism da d’istà l’é stat semper maor che chel da d’invern, enceben che chest abie scomenzà a crescer a na vida sensibola. Entant che te l’autra valèdes ladines l turism podea pojèr su desvalives impianc portamont, Fascia cognea se encontentèr de sia bona posizion geografica per l schi d’alpinism e l’escurscionism.

Ti egn Trenta, l Pas de Sèn Pelegrin doventa n zenter de atrazion per i sport da d’invern: n servije de trasporc de slites portèa i ghesć e i sportives da Moena enscin al pas, olache apede a n ospizie, l’Alberch Monzoni, senta de na scola de schi, l i spetèa. Te la val de Sora, la strèda fata sù su per l Jouf de Sela dai prejonieres rusc endèna la Gran Vera ge dajea l met a la jent de arjonjer la zona de schi de Gherdena. L jouf de Pordoi, ence chest coleà con Cianacei con n servije de slites, l ge dajea l met ai ghesć de arjonjer Piz Boé, la cima più auta del Grop del Sela. Endèna chi egn anter la doi veres mondièles i regimes ditatoriai europeans i finanzia trop l svilup di sport da d’invern. I atlec che chi egn gareja sot la bandiera e i colores nazionai e che arjonc resultac emportanc bele prest i doventa paladins del Stat e del popul.

Prum teater internazionèl de garejèdes de schi te Fascia l’é sie spiz più aut, la Reìna de la Dolomites la Marmolèda. Dò na pruma coreta de mèrz del 1932 te neif entrìa, la famousa »Direttissima« da Ponta Rocia fin ju al jouf de Fedaa, rua sun paladina. Venc la pruma edizion de ic Hans Noelke con l temp de 4 menuc, 8 seconc e 2 centeisemes e de la eles Livia Bertolini te 22 menuc. Che se aea tout sù l’encèria de organisèr la gares de la domenia per i turisć e la »Direttissima« l’era stat l Sci Club Marmolada, che enlouta l fajea pèrt de la Federazion Talièna Sport da d’Invern (F.I.S.I.), volù e finanzià dal partit fascist. Chest endrez, aboncont, l’é jit inant fin al scomenz de la Seconda Vera, canche i popui ladins à endò cognù fèr afidament sun l’arlevament del bestiam e l’agricoltura.  

L jerf del svilup economich che l’é stat cioncà con la Seconda Vera à scomenzà pian pian a butèr da nef: apontin te pec egn, i lurieres veiores leé a la tera à perdù sia valuta, fajan crescer te la comunanzes na neva sòrt de vadagn, chel leà al turism. Sun jouf de Fedaa se é ponté demez da nef con l’endrez de la »Direttissima«, che jirà inant fin del 1952, fin canche la pèrt finèla del portoi no vegnarà sepolida da l’èga de la diga, fata sù proprio te chi egn.

L’an dò del 1953 rua te Fascia su la neif de Pecol e Marmolèda la quarta edizion de la 3-Tre con demò 42 atlec scric ite. L’an dò teater de chesta garejèdes l’é demò l giacé: te chesta ocajion tol pèrt ence l norvegeis Sten Eriksen, con al col doi medaes de or vadagnèdes ti mondiai de Åre. Del 1955 sui portoes de Cianacei l’é l’Austria che fèsc tripleta, con l temp mesurà per la pruma outa da na moderna fotozelula. Del ’56, Toni Sailer, fresch de trei medaes de or olimpiches ventes vin Ampez, ge lascia l prum post te la classifica generèla a Ernst Hinterseer. Del ’61 rua per l’ultima outa te Fascia a Cianacei l’apuntament de la 3-Tre, con doi slalom sun Pecol e la libera da Rodela, fora per la Val de Salei e de l’Antermont enscin a Mortic. Te la lingia de atlec l’é ence l’Aga Kahn Karim che cor per la Gran Bretagna: vèlch memoria de Cianacei se recorda che per l’ocajion l’aea fità per sojornèr doi pians de l’alberch storich Dolomiti.

Te la Olimpiades de Cortina del 1956, prum gran event sportif endrezà tel raion ladin dolomitan, l paìsc vegn deldut rebaltà sotessora con de gran neva infrastrutures. Al scomenz de l’an, dut verteà, mencèa demò la neif… Neif che ampò vegn recuperà da etres lesc tras la doura de camion. I 822 atlec  che à tout pèrt a la Olimpiades del ’56 à portà te Ampez gran emozions e gaissa, che à segnà l scomenz de n temp leà più al scioldo che a la tera.

L nonzech arjont da Ampez bele prest à tout ite ence Gherdena, olache dò desvaliva competizions, del 1970 se à dejout i campionac del mond de schi. L slalom lèrch sul portoi »Saslong« l’é stat l’apuntament più spetà, vent dapò dal svizer Bernhard Russi, tedant a l’austriach Karl Cordin e l’australian Malcolm Milne. Del 1985 la Copa del Mond rua te l’Auta Badia, olache sun la Gran Risa gregn campions seghita ence amò anchecondì a se dèr batalia. Per n pez gregn apuntamenc del schi te Fascia no n’é più stat: demò dal 2006 la val ladina tol pèrt al projet “Piste Azzurre” e del 2019 la ge à dat alberch ai Mondiai Juniores de schi.

La Ladinia l’é semper stat teater de gran competizions, ma ence a tenc atlec de nonzech internazionèl chesta tera ge à dat la naa: da canche l prum pe de schi l’é ruà te Fascia, tropes l’é stat apontin i sportives che se à fat lèrga tel panoram internazionèl e mondièl.

Angelo Weiss a Chamonix. Del 2000 sun l sciaier più aut.

Timpruma l’era Renata Micheluzzi, che del ’56 l’à tout pèrt a la Olimpiades te l’ampezan, ma, amò dant, Willi Platter, maester de schi de Benito Mussolini. Dò da el ge é jit dò sie fi Carlo Platter e Giuliano Talmon. De chi egn, l’é ence Rinaldo Cigolla. Ge jirà dò a sie vèresc ence si fies Anastasia e Igor Cigolla, chest ultim or a la Universiadi de Belun del 1985 e terzo sciaier te la libera de Copa del Mond de Leukerbad del 1988. Del 1975 Diego Amplatz venc la Copa Europa de slalom e l’arjonjarà de bogn resultac ence tel zircuit maor. Ai 9 de jené del 2000 a Chamonix te la Franzia Angelo Weiss da Vich rua sun la piaza più auta. E amò i atlec del nef milené, da Cristian Deville, prum a Kitzbühel del 2012, Chiara Costazza, venjidora del slalom de Lienz del 2007, e Stefano Gross, prum a Adelboden ai 11 de jené del 2015, a la neva generazions capitanèdes da Federico Liberatore e Monica Zanoner.

Nicoletta Riz, revista Copa del Mondo de Schi te Fascia del 2021