Fèr lesciva col cender

Acà n an aee rejonà con Ester Cincelli de Lino Medico e la me aea contà coscita en prescia, ajache en chel dì no aee temp, che n’outa i fajea la lesciva col cender.

Me é semper pissà che cognee melfèrcontèrdemiecedapòl scriver che l’é zeche che pec amò recordarà. Emben enstadì son jita a la troèr, se aon sentà jù te stua e se aon fat na bela ciacolèda.

Apede nos, ence se encomai l’é se n jit per semper, l’era segur ence Lino. L’é sentù te la ousc de Ester, l’é vedù te sie eies da olache l’é slizià jù na lègrema, soraldut l’é sentù te sie cher che amò l padesc ma che l’à ence chel chiet de na vita vivuda tel ben e te la fe.

Emben ensema a Lino che segur ne vardèa jù e l scutèa se rejonaane delvers, apontin la me à contà coche se fèsc a fèr lesciva col cender.

Ester Cincelli anter si fiores.

»Dant da dut – disc Ester – l’é da dir che lesciva se la fajea demò doi oute a l’an, d’aisciuda e d’uton ajache l’era doi dis de lurier de doi o trei persone«. Me é fat gran marevea pissan a cotant che lavon ades e ge é domanà: »Ma no lavèei nia via per dut l’an?«
»Ei – disc Ester – i lavaa ben fora le massarìe che i duraa, ampò per far doventar bie bienc i lenzei o auter, vegnìa fat la lesciva col cender.« Cognea esser cender de legna biencia che vegnìa tegnù sù via per l’an e dapò canche l’era ora de l durèr l vegnìa tamijà fora con n cribie dai bujes picoi.

»Ge vel dir – la me conta – che te dute le ciase i aea l pael de la lesciva olache se podea tizar sotite e l’era murà tel mur te n cianton de cianeva o te n auter post, aboncont semper daite. L’era n muie gran e d’invern l servìa a chejer raves, erbacina, pomes de tera picoi per i porcìe o a sciudar i biroc. Sun ucé dapò zachei aea n gran casson de legn che se podea serar e l’era fat aposta per meter ite la roba paza«.

Dit chest son curiousa de saer coche i fajea a lavèr e belimpont Ester me conta. »Dant da dut ge volea sciudar aga per meter en smoi la roba che se metea te na brenta con mìngol de saon o de ‘Soda Solvay’. Le femene con forza le sbrosciaa fora soraldut i lenzei e le fiorete coi ‘popes’ (mace de paz) o coi segnes de le becade di pulejes. La roba la era n muie paza ajache se jìa te stala, te tobià, te ciamp , lurieres che mocigna e no se fajea duc i dis l bagn.

Endana se metea semper tel gran pael autra aga per chejer l cender che cognea jir doi o trei ore. Dò se tolea na gran brenta de legn che aea l cucon, se la metea sun n trepie ajache dò se cognea molar l cucon e far vegnir fora l lescivac che l vegnìa tegnù sù e sciudà endò da nef.«

Cucon?? Lescivac??? Paroles nience mai sentudes, che sarèl mai? L cucon l’é na sort de stropol che dapò se tirèa sù per fèr vegnir fora l’èga da la gran brenta, e chel l’era l lescivac.

»Te chela gran brenta junsom se metea la roba più fumola« e chiò Ester recorda che la femenes canche les metea en smoi les fajea conscidrazions ence grignolentes su cotant fumoi che era i èrc da lavèr. »Donca junsom se metea la roba più paza, le peze da cojina, siamans, sotebrae, i lenzei de lin o de bombasc, fiorete, fazolec da nas, soraite le toae, ence chele bele de cassabanch, i bechec, le coltrine, le ciameije da fasciana e chele da festa da om, dut demò roba biencia.«

En cont di fazolec bienc da nès Ester me conta che i ge servìa ai omin canche i jìa a messa e i se enjeneièa jù, sot al jeneie i metea n fazolet da nès bianch! L bref ence n jeneion! Ma jon inant co la prozedura de la lesciva.

»Canche se aea duta la roba bela conciada via te sie orden tel gran brenton che l vegnìa n muie aut, soraite deldut se metea n lenzel bianch fat sù cater oute e amò sunsora l bugarol.« Sbugole i eies: »Ve pree dijeme Ester, che él mai l bugarol??«.

Ester grigna: »L’é n lenzel fià ma no zarà che servìa da filter. Coscita canche se tiraa jù l lescivac col cender, l’aga jia jù e sul bugarol restaa l cender, zeche passaa ben ampò, junsot l’era l’auter lenzel che no fajea ruar nia su la roba lavada.

L bugarol – la me disc – l vegnìa tout via e l cender restà soraite se l duraa amò ajache n’outa no i trajea demez nia. Apontin con chest cender cot fora le femene jìa vin ruf e sfreaa fora le cocole dal pisc. No l’é pa nia da sconer – disc Ester grignotan – enlouta duc aea la cocola e no pa per meter ite fiores desche ades. (Se grignon duta does....)

L cender vegnìa metù amò da na man e durà ence amò per sfrear fora le fane de aluminium che le vegnìa bele nete e sgalizente. Ma l lurier de la lesciva no l’era amò fenì.« Gé sue demò a sentir contèr.

»Se lavaa fora bel net l bugarol e se l metea endò sora ite la roba. Se cognea dapò lavar fora l pael e meter a sciudar l lescivac che se aea tegnù sù. Chest se l fajea ence doi o trei oute. Da sera se lasciaa dut aló soranot.« Tire l fià! Zacan se podea mìngol pussèr! Pissave che gé son stencèda demò a sentir contèr.

Con la lesciva col cender la roba vegnìa n muie neta

»La dì dò – va inant Ester–se jìa endodanef a tizar sot chest gran pael e se sciudaa aga neta. Se fajea vegnir fora l lescivac che se tegnìa sù te candole ajache l servìa a lavar sù i fogn de stua e enscinamai a se lavar i ciavei.«

Jecolinela che spaent! Fèsc ben mìngol uria pissèr de se lavèr i ciavei con chest bret aboncont coscita la era, enlouta no l’era ‘shampoo’ e con chest lescivac che l fajea scoz, a dir de Ester, i vegnìa bie nec. Sentù chesta jon inant con noscia lesciva.

»L’aga neta bela fersa la vegnìa trata endò sora ite duta la roba, se tolea jù dal trepie la gran brenta e se scomenzaa a stricolar fora. L’aga restaa te brenta e se la duraa a lavar l guant da color.«

Chest l’é tegnir cont e esser ‘ecologics’, nos aldidanché aon dut demò da emparèr da nesc veies. Ma l lurier no l’era amò fenì. »Ma ve pree dijeme, che se cognel amò fèr che gé son endò jà stencèda« ge die a Ester.

Ela se grigna e la va inant a contar. »Se jìa vin ruf a rejentar e endò stricolar. Chest se l fajea de doi ajache i lenzei i era gregn e i pesaa. En ultima l’era da i scorlar fora bel delvers e i far sù che coscita i era ence beleche mec soprescé. A la fin chisc lenzei nec e soraldut endò bie bienc s’i metea a siar speran che sie bon temp ajache dò n lurier coscita fossa stat pecià che la roba aesse ciapà la pievia. Te diré – disc a la fin Ester – che la lesciva col cender tegnìa la roba neta n muie più al lonch che ades con duc nesc polvres da lavar.«

Zacan sion rué a piz. Che fadìa fèr lesciva!!! Gé no sé, se a voetres che lejede ve sozede desche a mi, gé son chiò che sue e me fèsc mèl a dut demò a sentir contèr. Se grignon mìngol, aboncont peisse che noscia femenes da zacan les aea dassen na gran forza per fèr n tèl lurier e me peisse che la machina da lavèr l’é stat na zis bela e gran invenzion. Ence Ester la é a una co me!!!

La ciacolèda la é fenida, vèrde amòlafotodeLinoemesàchel cigne de scì che aon rejonà delvers. Dò n bon café me n vae contenta e me peisse che chest cogne proprio l scriver!

A Ester ge sporje n bel e fort develpai de cher e ge die a n’autra più bela!

Annelise Vian , La Usc di Ladins 24 del 2020