La gejia che fèsc pèrt de la comunanza

La gejia più joena del Comun de Cianacei l'é ence chela più grana: chela del Sacro Cher sun Col de Ruìsc, che la pel vantèr na storia forta e fona leèda a la comunanza. Defat, l'é stat belapontin la comunanza a la fèr sù, dessema a sie preve don Fortunato Rossi. L'era n preve dassen benvolù da la jent, ajache l didèa duc chi che aea de besegn. Per regoer i scioldi l'aea enscinamai endrezà dotrei oles de la fortuna. La jent aea lurà a scuf metan a la leta sie temp e sie mesi.

La storia

La jent de paìsc portèa saolon per fèr ziment da la Veìsc e i sasc da Fossalac. Chest ultim lech l se troa n mingol più en su respet a la gejia e chiò se troèa na cava de la Frazion, olache la jent jìa a se tor material. Te chel temp, aboncont, no mencèa la dejamicizies: l'era n mingol de beghes anter chi da Grìes e Cianacei, ajache a chi da Cianacei no ge comedèa cogner jir fora Grìes per tor pèrt a la funzions, dò che i se aea tant dat jù per fèr doventèr curazìa la gejia de Sèn Florian.

Ai 18 de november del 1928 don Fortunato Rossi, Beniamino Bernard de Luigi e Giovanni Pezzei de Giuseppe i se à binà te calonia per troèr fora na soluzion a la situazion religiousa. La doi gejies de la Madona de la Neif e de Sèn Florian les era massa picoles per ge dèr lèrga ai fidei. L'era stat doi proponetes: slarièr la gejia de la Madona de la Neif o n fèr su una neva e i à azetà la seconda. Timpruma l’idea l'era chela de fèr su la gejia te Pian de Parèda, ma l'era pericol che la Veisc jisse per sora. L'é stat troà l lech e coscì don Fortunato Rossi à scomenzà a trèr sù i scioldi.

L'era ai 5 de aost del 1935 canche la pruma pera é stata pojèda da monsignor Enrico Montalbetti, Piscop Coadiutor de Trent. L projet l'é stat metù jù da Renzo Masè e Guido de Unterrichter. A cajon de la seconda vera e la mencianza de scioldi, i lurieres é stac sperlongé. Ti egn dapodò la Frazions à dat si scioldi per fenir sù chest gran lurier.

Al scomenz se pissèa de fèr su ence na balconèda, ma ajache dò l Conzil Vatican II l cor no l podea esser spartì da la jent, no la é più stata fata. L fabricat l'é stat benedì aldò di documenc del 1942 endèna la vera; ai 23 de oril del 1967 l’é stat dapò consacrà n nef utèr.

Se pel amò  recordèr che l dì de la inaugurazion la statua de Sèn Florian aessa cognù vegnir portèda en procescion da la Gejia de Cianacei a chela del Sacro Cher. La sabeda sera dant, aboncont, no la era più olache la cognea esser. Ot dis dò la é stata troèda te n cougol sa la Sia de Cianacei, olache endèna la vera se jìa per se parèr dai bombardamenc. L'era stat valgugn da la Frazion da Cianacei che no i volea perder sia curazìa.

Piroles en cont de la strutura

Te gejia, desche ades, l'era doi files de benc: te n document l'é stat troà fora a che families che i benc ge partegnìa, defat i fidei i paèa per aer n post. La fila de benc a man cencia la era resservèda a la femenes, conforma na veiora tradizion bizantina. Te gejia enlouta l’é stat metù statues, desche chela de Geju con i brac averc e chela de la Madona con l guant a l'antica, che ades é stata loghèda tedò la strutura.

Semper te gejia, l'é stat depent na Via Crucis: l pitor Bruno Colorio l'à depent sie mus te la X stazion, l’om che tegn te man la moscheta. Te la medema stazion vegn depent ence don Fortunato Rossi, unich roman con i ciuzé da jir sa mont. L depenc ence l'èrch e l mur a cencia de l'abside.

Se rejonon amò de la Via Crucis de Colorio la jent l l’à voluda desche voto, ajache l paìsc l'era stat sparagnà da la bombes de la vera. Se cogn apontin dir che l’Hotel Dolomiti l’era enlouta na zentrèla de comunicazions di todesc de gran valuta strategica a livel mondièl che i anglo-americhegn i aessa volù dessatèr ma che, se disc, no i aessa mai troà fora delvers canche i sgolèa coi aerei sora noscia val. Chest suzedea anter la fin del 1943 e la fin de la vera del 1945.

La Tabela

La tabela con su la storia de la Gejia del Sacro Cher de Gejù la ponta demez da na pissèda de Francesco Mazzel. “Canche jìe te gejia, vardèe en su envers Fossalac e me pissèe coche la jent la se à desmentià de coche l’era stat fat sù la gejia, de coche na comunanza se aea dat jù. Coscì na dì son jit da don Mario e con sie didament sion stac bogn de la meter a jir.”. La tabela la é lèria 120 centimetres e auta 80 e l sostegn l'é de acèl lurà con la pomoles endorèdes.

I retrac su la tabela i é de Francesco Dezulian del Garber, biné ensema da l’Istitut Cultural Ladin e tras l’archivie de la Frazion de Grìes. L projet grafich de Francesco Mazzel l’é stat lurà fora da la firma de Armando Mich da Pera e l telé realisà da la firma Badiametal de Poza. La scomenzadiva à troà sobito l didament da pèrt del Comun e da la doi Frazions de Grìes e de Cianacei. La scrites les é per talian, per ladin e per engleis.

Nicoletta Riz, dal archif de La Usc di Ladins 35 del 2019