Fascia Calcio, 40 egn de balon e de atenzion ai joegn

Walter Ghetta te n retrat de jai egn de Tony Camerano.

L Fascia Balon destuda 40 ciandeiles. 40 egn de jech al balon, 40 egn de alenamenc, de partides, de atenzion per l setor di joegn. Ma ence 40 egn de resultac, a outes positives, a outes de manco, che à fat crescer più che na generazion de sportives. Festejèr 40 egn per na sozietà sportiva l’é segur n bel resultat, vel dir recordèr duta chela persones che se à dat jù te chisc egn per portèr inant l’atività, per fèr crescer la sozietà e con ela ence n grumon de atlec che tel Fascia Balon à troà n pont de referiment segur, percheche apede a l’aspet sportif l’é da recordèr e da uzèr fora ence chel sozièl.

Gran pèrt de la storia de chisc 40 egn l l’à fata con empegn e dedizion l “presidentiscim” Walter Ghetta, pilèster de la sozietà, ajache l la vida dal 1990 e dant l’é stat per egn n “bomber” de capazità ezelentes. La pascion e l’amor per l balon se l’enten sobito, a ge vardèr ti eies, a l scutèr canche l conta de si recorc, semper bel grignolent.

Walter, te recordeste coche l’é nasciù l Fascia Balon?

Walter Ghetta: “La sozietà la é nasciuda del 1978 con l’inom de A.C. Vigo. Tel prum diretif eraane gio, Duilio Durigon president, Saverio Sommavilla vize president, Antonio Ghetta secretar, Guido Loss, Antonio Camerano e  Corrado Trentin. Chi egn eraane n grop de jiadores con na gran pascion per l balon, soraldut gio, Andrea Weiss e Guido Loss. Jiaane fora tornei anter i paìjes de Fascia sul ciamp de Cianacei, eraane n muie engaissé. La squadra de Ciampedel l’era chela che aea i jiadores miores, l’era de gran batalie, gio ere bravo de jiar e me recorde che canche aon jià contra l Cianacei i me à metù sot Paolo Valeruz, l me à dat na peada te n stinco che son restà aló cet, i me à fat fora sobito. L’era batalie sane. Enlauta ogne pra l’era bon per jir a se alenar, sa le scole, ti pre de Sènt’Uiana…

L’A.C. Vigo te sia pruma sajon del 1978/79.

Me recorde che con Andrea Weiss son jit ju a Trent a rejonar con la Federazion per meter su la squadra e peissete se aon metù con la machina da scriver te piaza Duomo sun n picol desch toron per far jù la domana. Se aon scrit ite sobito al campionat de terza categorìa e la pruma partida l’aon jiada contra l Jian, en ocajion de la inaugurazion de so nef ciamp de balon. Andrea Weiss enlouta l jiaa con i joegn del Busan ajache l studiaa lajù e a la partida l’aea la tuta de l’A.C. Bolzano, aon venciù 4 a 1. Sul giornal i aea scrit: “Vigo di Fassa batte la Cauriol 4 a 1 ma rinforzata da giocatori del Bolzano.”

Nosc prum sponsor l’é stat Saverio Sommavilla Termosanitari che l ne à regalà le maie.”

I jiadores de l’A.C. Vigo te la sajon 1980/81 .

Co éla jita i prumes egn?

“Eraane scric ite te n campionat provinzial, peissete che se jiaa da chiò fin a Segonzan, siane 12 squadre enlauta, ades n’é cater. L prum an sion rué secondi, l secondo an aon venciù e sion jic en seconda categorìa fin de l’86/87. De l’84 sion stac bogn de meter sù ence na seconda squadra de resserve e de l’87 na squadra de joegn under 18.”

Can él mudà l’inom de la sozietà?

“De l’83/84 aon mudà inom da A.C. Vigo a A.C. Fassa. I prumes egn jiane a se alenar jun Pucia, l’era poc che no fenìa più, ma no l’era mia le doce per se lavar, jiaane fin che eraane stufes e dò se n jiane a ciasa. Dapò sion jic per n trat a se alenar a Moena, peissete che da sera per se far lum, empeaane su i fari di auti enlongia ju l ciamp de balon.”

Can él stat fat su l ciamp de balon de Vich?

“Del ’88, l’era de mesura 100x58, con le tribune de peton, canche sion jic en Promozion (‘95/96) aon cognù l slariar, l cognea esser 60x100, aon cognù tirar jù dute le tribune.

De na roba son dalbon stolz. Son jit gio te Comun ti egn ’80 per domanar l ciamp de balon. L teren l’era de la Curia de Persenon, l lo seaa Lino de Ciaria, l Comun l’aea n contrat per 20 egn. Gio é semper spent e domanà che vegne fat su l ciamp de balon fin canche l Comun se à comprà l teren e l l’à destinà a zona sportiva. Da zeche ora son jit perscin a Trent con Gigio Frecol per veder se jia inant l projet, l’era l’ultim junsom na crigna. Con dificoltà l’é stat fat chest ciamp de balon, ma gio me é semper batù per chest, seghitae a domanar e l’aon abuda venta e de chest son proprio content.”

Fin can èste jià a balon?

“É jià fin de 43 egn con la pruma squadra e dapò fin de 56 egn con i Amatori. Del 1990 son doventà president al post de Duilio, el no volea più far percheche l’era più squadre e donca più lurier.

Duilio l’era n president se pel dir de raprejentanza, l vegnìa demò de domenia, ma enlouta ne jìa ben aer na persona emportanta. L balon no l’era amò tant conscidrà desche sport, no l’era la mentalità. Me recorde che canche domanaane l ciamp de balon i più veies me dijea: “ma se volede far sport coré su fin sun Vael e ju de retorn.” Ite per anter ence Andrea Weiss à fat l president per n an, del ’80/81.”

Ti etres paìjes de Fascia no erel squadres de balon?

“Scì, a Cianacei i aea na squadra, i jìa a far amichevoli entorn, ence gio da zeche ora é jià con ic, ere l “straniero” de Cianacei. L’é semper stat na bona colaborazion con i autres paìjes de la val per se emprestar i jiadores. Me recorde che da zeche ora Luigi Dantone l jiaa col Molina e ge aane domanà che l vegne a jiar con noi, emben aane cognù ge dar 400 mile lire al Molina percheche i ne lo dae.”

L’é stat egn de gran sodesfazions…

“Ei, aon seghità a se miorar, del 1995/96 sion ence passé da la Pruma categorìa a la Promozion fin del 1998 e dapò sion stac bogn de jir en Promozion amò ence del 2012/13 con Luciano Cigolla, ma demò per an percheche se à fat mal l portier e l’an dò sion jic deretorn en Pruma. Fin del 2005 sion jic semper en su ence desche iscrizion de bec, sion rué adertura a n’aer 250, ades n’aon presciapech 200. Per n muie de egn aon abù ence le squadre de Amatori e de le Femene, che le à abù n gran ejit, le à fat presciapech 10 egn, dal 2003 al 2013.”

Chisc egn passé l’é vegnù ence de gran squadre a far ritiri sa Vich…

“Ei, aon abù la Sampdoria, l’Atalanta, la Lazio, l Genoa, la Fiorentina, l Parma, l’é stat na graniscima esperienza per noi, ence se l’era 15 dis che gio cognee lurar a dò a dò. Ades endrezon tornoes de joegn che vegn a se alenar.”

La gran squadres no les é più vegnudes canche aede metù l’erba faussa, co éla che l’aede metuda?

“L’erba faussa l’aon metuda del 2006, son stat gio a la voler percheche aee vedù l ciamp de Molina di Ledro e l me aea sapù n muie bel e sorì. Ades che l’à più che 10 egn l scomenza a esser dur, ma al scomenz l’é beliscim. L problem l’é che cognaane jir a jiar ja Soraga per far jiar duc i bec e presservar l ciamp sa Vich de erba percheche se se fasc jiar n muie de squadre l se roina sobito. Per chest aon fat chesta scelta. Per chel che varda le squadre de serie A l’é doventà semper più senester le aer chiò entorn percheche le preferesc jir fora da la Talia olache i le paa n muie de più. Sion fortuné fin canche Moena la é bona de se tegnir la Fiorentina.”

L Fascia Balon l’à ence n muie de squadres de joegn, él na gran responsabilità ge stèr dò a dut l’endrez?

“L’é semper più senester percheche l’é semper più papieres da enjignar, cogne dir che per fortuna aon na brava secretara, Emanuela Montrasio, che ge stasc dò a dut e la laora con gaissa e pascion. Dant aon semper abù secretares part-time, Roberto Meca l l’à fat per 13/14 egn. L’é n gran lurier canche l’é da endrezar i servijes per menar stroz duc i jiadores. Per fortuna che ades, de gra al contribut del BIM, aon trei pulmins neves. Gio canche veide che i va stroz con n marudel de bec me cruzie semper, ge die de jir pian, stae con festidech.

Da n trat en ca l’é semper più senester coi numeres di joegn, soraldut canche i rua a 13/14 egn e defat la Juniores l’é la squadra padesc de più, per chest cerion la colaborazion con Moena. I joegn à semper più atività da far e i vel se empegnar manco che l’é meso.”

La squadra del Fascia Balon 1^ categoria, sajon 2015/2016.

Coluna él stat la più bela sodesfazions te chisc 40 egn?

“N’é n muie de sodesfazion… la pruma uta che aon vent l campionat l’é stat na gran sodesfazion per duta la squadra. Ma peisse che le vente de le trei Cope Provinzie sie chele che più ne restarà tel cher: una a Sèn Micel e doi oute al Briamasco, te chi momenc tu sente proprio la saor de la venta, no l’é desche venjer n campionat che l’é n pez che tu l spete. E dapò enlauta l’era vegnù fin a Trent na coriera piena de jent a ne sostegnir e a ne far festa. Ence l prum an, canche aon fenì fora l campionat e sion rué secondi, a l’ultima partida a Madrano l’era vegnù a coriera entrìa de jent a ne veder.”

Él valgugn che te volesses rengrazièr per te aer didà te chisc egn?

“N’é n muie che volesse rengraziar… na menzion volesse la far per doi persone che à jià n muie de egn tel Fascia Balon: Giorgio Mazzel e Cristoforo Debertol che l’é 30 egn che l vegn a jiar. Spere che sie mie sostitut percheche l’é dassen bravo e l ge vel ben a la sozietà. Dapò volesse ge dir n fort develpai a mia familia, a duc i alenadores, i dirijenc e i sponsor che ne à didà e sostegnù te chisc egn.”

Tia pascion per l balon ampò no la se à amò morentà via…

“É semper abù na gran pascion, de sabeda domarena son chiò te ciamp per veder dute le partide. Gio de balon no son mai stuf. Canche ere joen i me aea domanà de jir a jiar con na squadra da Roma che la era sal Corona, mie pare no l me à lascià jir… pecià, e dapò me aea domanà ence la Dolomitica, ma enlauta scherzeto, l ciampanil… Ere gran e veloce, doi calità emportante per n jiador.

Far l president l’é n gran empegn, vegne chiò al Cotura béleche duc i dis, canche l’é n problem i vegn semper da me, son mingol l jolly… ma desche te dute le robe, se te piasc no tu fas fadìa.”

Intervista de Monica Cigolla, da La Usc di Ladins 20 del 2018