La casermes austriaches
La casermes militères de Vich les é states fates su anter l 1908 e l 1912. Endèna la Gran Vera les é states senta del comando austriach. Apede a la cinch maores, n era stat fat su, endèna l conflit e toutes ju a la fin, autra doi più picoles, olache l era logà l’enfermeria e n picol teater.
Do la vera i fabricac à ciapà ogneun n inom (Piave, Vittorio Veneto, ...) e l é doventà colonies per i fies di sudé e i orfegn de vera. Les vegn venudes a la zità de Milan e les é states usèdes desche colonies per bec. La strutures aldidanché les é a servije de la comunanza.
Bibliografia: AA.VV., 100 anni di servizio ai soci, Cassa Rurale Moena, 1999
Acà mingol de temp siane do che chieriane informazions su la casermes. N é ruà en aiut Bruno Ghetta de Martin che l ne porta dant sie recorc te n scrit che manà ite da Assunta Merli l dì de Pèsca del 2022, ai 17 de oril, che rengrazion de cher!
Zeche en cont di inomes de la casermes: Vittorio Veneto, caserma amò da fèr fora; Piave, cèsa Anfass; Col di Lana e Monte Grappa, cèsa de paussa; Pasubio, Comun general de Fascia; ospedèl/infermeria, Museo ladin.
Do la Gran Vera les é states dates a l’Associazione Reduci di guerra de Milan e vegnia su i fies di reduci en vacanza. Te chi egn n muie de sentadins da Vich, Sèn Jan, Poza, omegn e femenes ciapèa lurier a laverjù, fèr fac, tegnir net e rincurèr su daite e de fora da la majons e ence sche vardians.
Do dal vardian Rossini de Milan, l prum vardian fascian l é stat Franzi de Martin che l à fat chest lurier dai egn Caranta fin canche l é mort. Una de sia fies la é nasciuda proprio alò. Do da el l à ciapà ite l lurier de vardian de la Colonies Milanesi (coscita les aea ciapà inom) Luigi Ghetta de Gusti, monech de la Pieif de Sèn Jan, e sia femena Erminia. Ti egn 1955-1960/’62 les era states toutes a fit dall’ Arna dei Carabinieri: chisc vegnia su tant d'istà che d'invern col Gruppo sportivo e coi allenatori a fèr formazion sportiva e arcedament.
Chèrtes de posta che n é stat manà da Manuel Adami, che rengrazion de cher!
