Ah... vaghe mata per l bechet

Bechet lijier desche l’aria per n gramièl da fascèna.

Cara fascènes, l bechet, chel de San Gal, chel fat a àcherle, chel fat coi fujìe (cfr. Klöppelspitze, tómbolo), chel lurà a filet, chel lurà ai feres… dut cant l’é sinonim de lijiereza, fantajìa, fineza, erotism. Per chest n bechet massa pesoch, ti eies de na fascèna e fosc no demò de na fascèna, l’é pesoch e nia bel.

Bechec lijieres e peziousc

Zacan ge donèr n bechet a na fémena l’era ge donèr vèlch da prezious. L bechet più prezious e sotil amò inchecondì, a mi veder, l’é chel de Chantilly, ma ence n scial de bechet da Unejia (cfr. tod. venezianischer Spitzenschal/ital. Scialle di pizzo veneziano) no l’é n sgherz!

N gramiel de bechet de Chantilly, l’é zenz’auter vèlch che na fémena no se desmentia, na nìgola lijiera de bechet lurà apontin te la Franzia a Chantilly… e se chest bechet de Chantilly inchecondì se l durassa per fèr n guant da sera o na ciameija da de net, nience n om no l se lo desmentia più, segur! Aboncont per chest bechet da comprèr te la più bona boteighes de drapamenta, vèlch outa ence demò sun ordinazion, injignave n bon, ma bon tacuin… prezious desche n òr, dijee.

L bechet nasc te la Tèlia

L prum bechet lurà a voia (reticella) l’é vegnù fat del 15eisem secol chiò da nos te la Tèlia del Nord. Tel cors del 16eisem secol chisc bechec i era in gran zircolazion, sessaben demò anter chela jent che podea se i permeter. Del 17eisem secol da chesta “reticella” se à svelupà la tecnica del bechet lurà co la vogia, soraldut cognosciuda e prateghèda a Milan e Unejia. I bechec inlouta i vegnìa fac per i tachèr ite te la mègnes, ti mansec, ence te chi da om, e i ge fajea da col a ic e eles. Sessache l’era n lurier tan gran e lènch e per chest i bechec i era tant revel cères che demò i più riches i podea se i permeter. La noboltà franzousa la era inamorèda di bechec taliegn e coscita inlouta i franzousc èa portà n muie de carantan te la Tèlia. L re de Franzia Louis XIV, dit l “re soreie”, “Le roi soleil”, l se èa donca pissà de finanzièr la produzion de bechet franzous, ajache senò massa finanza franzouses les fossa fenides te la Tèlia.

Intorn ai prumes del 1700 l bechet fat a vogia l vegn despassà da la tecnica de bechet a fujìe, (cfr. Klöppelspitze, tómbolo) che la é più svelta e donca se podea aer na produzion de bechec più percacenta.

Bechet fat a àcherle.

La produzion de bechet la se èa fat più svelta de gra a de neva tecniches, tant che a la fin del 18eisem secol ence jent manco rica podea se permeter mìngol de bechet sun l guant de la domenia. L bechet lurà a àcherle l’é nasciù te l’Irlanda al scomenz del 19eisem secol, donca piutost tèrt.

L bechet te Fascia

Per chest la ciameijes da fascèna, chela più beles e preziouses, no se les recognosc demò da la fineza del lin, ma ence dal bechet che se l’é a tómbol volea dir che la ciameija da fascèna in costion la é bon vegia e la fémena se èa vagà vèlch da bel, conscidran che inlouta te Fascia no se nodèa seguramenter te l’òr! Ence de bie gramièi de bechet da jir col guant da festes l’é stat troà te Fascia.

Gramiel da fascèna ricamà sun tull de bombèsc (cfr. garza di tull).

La fascènes, alincontro de la fémenes de autra valèdes del Tirol, no les era de gran artejènes del bechet, les cognea massa fèr lurieres da om, l bechet l’era vèlch che peces èa l met e l temp de se fèr instesses.

Co la vegnuda de la màchines che fèsc bechet, aldidanché n bechet lurà a man de che tecnica mai che l sie, l’é na reèla opera d’èrt.  L’à da esser cèr percheche l conscidra la ores e l’artejanat che se pel dir l’é dassen n’èrt.

ClaudiaConta, La Usc di Ladins 38 del 2018