La brentana del november del '66
L é passà giusto en an. En ciel snigolà el trei de november l à scomenzà a manar ju èga che no l la finiva più. I rives i se aeva sgionfà da scomenzar a se cruziar del bon. E pò l pejo.
Entorn le ot da sera del 4 de november dal rif de Sèn Pelegrin aló da la sia del Comun, sbarba la prima èga; le machine che va verso Fassa le ge rua apena a passar. Entorn le diesc, l’èga de rif la porta en te ghebo tant de chel material che el rua a stropar la strada ale èghe che vegn do.
En sbarbol el sdrava sora ju i mures de rif e el porta en enfinità de material int per el scomenz de la strada de sèn Pelegrin, e en te pöce ore l’empienis de balogn, de giara e de sabion dut Ramon.
La jent fa chel che la pol; chiche à stale i porrta via el bestiam en prescia; en te pöch temp, duc i locali de Ramon sote strada i à l’èga e l material da int vita; se embloca e vegn soterà dotrei auti vin Ramon; l’èga ló da pont pede l Faloria la se desćiarea en te l’Aves gran da far paura, ma tera, loca e baloc i vegn portè dale èghe ence ju per l vial e ca da pont en te piaza davant al Comune.
Chel auter sbarbol, l seghita do so cors en te rif, l va a se bina co l’èga de l’Aves, l magna fora en te pöch temp la strada int dal Rico Mantino e l fa crodar l coianton de la ciasa de la Tresina del Piciazin. Tal Zigher i slogia en prescia; l é pericol che se n vae dute le strade do strada. Se bina i pompieres e jent volontadiva che aida a taiar piante e menar bore per ge far spona contro l’èga.
Endana se leva l vent; da doman se ves na gran frata de albres reversé sora ju e de la int de Frata, da Pra Compert in int. No l é n pont che l aesse tegnù, sui rives.
Ta i Ponc l é n disastro; tonelade de material e bloches de sas fa en masaré olache inant l era n bel bosch de ca e de là dal cors del rif. Intant l’èga del sèn Pelegrin la seghita a menar material jun Ramon. La rua a l’auteza de le sćiale de la maestra Parolota che, malpossola i la porta fora da la man de finestra.
Entorn le dies del 5 de november i pompieres, con piante rebaltade i ge rua a stropar l’Aves aló da la sia; ma doi ore do, l’èga la sbarba endò da nöf. Entant l à ampò lascià de piover, vegn fora en sol spevie e malà, ma amancol nol piöf.
El Comune l se organiza. El vicesindaco Bepi de la Campagnola, al post del sindaco Angel Weber che l é fora de paes, l bina la Giunta, valgugn consiglieres, el Cap. de P.S., i dezit de ge dar l’encombenza al Dario Zorzi de proveder a portar demez l material e a sanar chel che l é possibol. Coscita squadre de volontadives se met al laoro. Dapò da na setemana rua ence la luce; l’Ilario Bez con doi omegn no l à rechie fincanche no l ge rua a dar la corente al paes.
Jun chele Part olache l’Aves l era jit fora ence de aost i laora per refar la strada e ge dar comunicazion a la val, taiada fora da dut. Le scole le resta serade per dotrei dì percheche no i pol empar el “riscaldamento”.
Finalmenter rua en Comune da Trent la prima telefonada dapò el disastro. Se vegn a saver che Moena la é stata ancora fortunada en confront de autres siti: Trent soraldut, pede noi Pardac, Valfloriana, e i paes do el pas de Sèn Pelegrin en tel Belumat: soraldut Cencenighe, e l teritorio de Primier e de la Valsugana.
Ruspe e pachere manade da la Region le é en opera en te dut l Trentin. I laori che i à cognù lasciar là per via del freit, i taca man a seghitar d’aisciuda. I met ju i bolognign te piaza Ramon e i refasc l pont del Ri de Vanc e chi crodè do l rif de Costalongia, Pelogran.
Articol da: Nosha Jent, november 1967.
Retrac da: Recorc smarii. Moena in 100 foto d’epoca. Grop Ladin da Moena
