Joachina Mussner

Joachina Mussner é nasciuda ai 12 de aost del 1907 a Selva. Do la scola te Gherdena, a la fin de la Gran Vera la é jita a studièr a Trent, olache del 1926 l’à arjont l diplom de maestra.
L’à ensegnà per diesc egn te desvalives istituc del Sudtirol: a San Piere, vejin a Baissiston, a Pianizza, dapò Aica de Fié, Laion e ence te na picola scola del Trentin. Do se aer maridà la se à tramudà da nef te sia val, olache dal 1935 l’à lurà te la populères de Sènta Cristina e te la mesènes de Ortijei, fin a la penscion.

Anter l 1926 e l 1958 l é stat una de la maestres de scola più cognosciudes e stimèdes, moscian ence gran capazità a se relazionèr con joegn e dozenc.
Del 1969 la é stata litèda te l’aministrazion de Sènta Cristina no demò per l consei de comun ma ence te jonta con delega al sozièl e apede vizeombolta.

Do la demiscions del ombolt Vigil Insam, duc i conseieres i l’à sostegnuda a jir inant con l mandat e dal 1971 al 1974 la é stata ombolta de Sènta Cristina, pruma femena de dut l Sudtirol a arjonjer chest zil de emanzipazion. Ge volarà spetèr i egn Nonanta per aer te Provinzia na seconda femena con chesta encèria. Te sie mandat l’à desmostrà fidaboltà, onestà, esperienza de vita e gran saer, la se à dat ju acioche vegne avert la scola mesènes e la speziaria. La é stata nominèda sentadina onoraria de Sènta Cristina e del 1983 l’à ciapà la medaa al merit del Land Tirol. La é morta ai 31 de jené del 2001, de 94 egn.