Gabriela Pederiva Dellantonio

Gabriela Pederiva la é nasciuda ai 5 de mèrz del 1933 a Soraga. Del 1962 l’à maridà Mario Dellantonio Tasin da Moena e l’à abù 5 fies. L’era na femena forta, semper en moviment, l’aea semper zeche da fèr, zaolà da jir, tant per la familia, che per la cèsa, l lurier e la comunanza.

L é stat una de la pruma femenes de Soraga a jir a crepes e coi schi con la braes. Fin canche la se à maridà l’à lurà vin Gherdena te la firma de zipiadores Leo Prinoth ‘Lepi’ da Ortijei, la tegnia i conc e la corispondenza internazionèla ajache la saea ben todesch e franzous.

Gabriela se à semper dat ju con amor e pascion per la cauja ladina. La é stata per egn conseiera de l’Union di Ladins de Fascia. La era anter i ativisć del moviment fascian del 1973, l an de la gran ‘utèda’ envers la politica, canche l é stat ora de se bater contra la Provinzia de Trent, ensema a so om, che enlouta l era president del Grop Ladin da Moena. Per desvalives egn l boletin Nosha Jent é stat stampà te cèsa e sacotenc l é stat si contribuc per la stampa ladina. Con gaissa e amor la se à dat ju per tegnir vives la tradizions ladines, l’aea semper gust de se trèr ite l guant a la fascèna e con empegn la se à spenù per nosc lengaz. So gran cruzie l era che no vae a morir fora l ladin sćiantif e per chest la se à dat ju a traslatèr libres dal todesch desche “I fascegn a le vere de liberazion” de Hugo de Rossi e del 1998 “Paster zenza steile”. La é morta ai 22 de mèrz del 2007.