Aldidanché veder na femena che va coi schi e che fèsc la maestra de schi l’é zeche che no fèsc più marevea, alincontra a la fin di egn del 1950 l’era vèlch da dassen fora de anter. Per chest canche son vegnuda a saer che Valentina Rossetti l’é stat una de la pruma maestres de schi de Fascia ge é domanà se la me conta chest toch de sia vita.

Dedant a n bon café se aon fat dassen na gustegola ciacolèda ajache Valentina l’é na persona n muie paruscenta e sorida. I recorc se à encroja anter chi de familia, la vita da bec e la gran pascion de jir coi schi.

Donca se aede piajer ve conte chesta bela ciacolèda.

»Ben - la disc - gio son nasciuda a Vezan te la Val di Laghes ai 14 de dezember del 1942, mia mare l’era Pierina Macchietto del Ciador e mie pare Francesco Rossetti nasciù a Farra D’Alpago. Mie pare l’era spion del bosch e del 1945 l’é vegnù a far servije a Poza olache dapò l’à metù reisc con duta la familia.

»La costion più grana l’era l guant. Aee la gabana co le ciauze de lana tegnude su da lastesc taché te n leam da ciauza.«

La pascion per jir coi schi la é scomenzada da picola, aré abù 5 o fosc 6 egn e vedee mie fra jir con n pé de schi de legn con zeche picole ponte. É volù proar.

Jir coi schi no l’era nia, anzi n muie bel, la costion più grana l’era l guant. Aee la gabana co le ciauze de lana tegnude su da lastesc taché te n leam da ciauza. Me molae ju per Col de Zecol ma dute le oute che sutaae ja bas ruae col cul su la neif! Disto che levae su de bot!«

E ju na bela grignèda.

»Da zeche ora na mia ameda sartora me à cojì n pé de brae fate fora da chele de mie fra, coscita amancol mie vindedò l’era a salvament!

Do i me à ben comprà n pé de brae mingol più grossete, ma sot no aee nia e d’invern l’era freit. Che veste enlouta l’era meseria no l’era scioldi, peissete che d’istà se jia fora per i pré e se magnaa su de dut, azole, pavares, zucorie, ciugnaane enscinamai ciuite.

E dapò te conte pa chesta, che più che fazile nesciugn più se recorda. Ti egn del 1950 ja Poza l’era na sort de industria de cassete per i pomes. L’era i bec che le embrociaa e chi de la Val de Non i vegnìa col camion a se le tor.«

Conteme, co fajeei?

»Ben l’era i tisleres chi del Lò, de Jef, de Placida, de Bastianol, de Pierac, Paolin Zeli e Gino Malgher che taa fora le stiche. Gio aee nef egn e coi autres bec jiaane sot la bindela a se le caparar, dapò con ciodi e martel le embrociaane. Con n stamp aposta se fajea »le teste« che fossa l sora de la casseta olache l’é le mantie, dapò se metea jù doi ciantogn e se metea la stica olache l’é la mantia. Con n auter stamp se fajea l fon, se metea le bree, doi stiche e se fenia l sora co le lamele. Per l fon e »le teste« se ciapaa doi lire e mesa, per duta la casseta 10 lire. Con chela vertola me é mudà fora dute le ombie da le tante martelade che me é dat sui deic.

Me recorde ence che joenec de 12/13 egn i luraa per la Pro Loco. I se endrezaa n caret con doi rode veie e cater bree per jir a ge portar le valisc ai ghesć. Da bec en su aon emparà a se l vadagnar.«

Me conteste del temp de scola?

»Son jita a scola col maester Giovanni Pederiva de Teta che l’endrezaa jà garejade. Gio é fat la pruma gara sul portoi del schilift che l’era sa Vich via Larcioné, aee 8 o 9 egn, me recorde che l’era Carleto Weiss, Franco dal René e Tullio de Ciout. Da ló l’é scomenzà l troi che me à portà a doventar maestra de schi. Me é scrit ite tal grop sportif Vaiolet e con Aldo Fanet e Tullio de Savero jiaane a far le garejede soziale. Me saea bel da mac far conc, coscita é fat le comerziale ja Pardac, e ence con chela scola é fat garejade sun n schilift che l’era forinsom Pardac olache ades l’é i ciavai.

Canche mie pare l’é jit n penscion aon scomenzà a far su la boteiga di pesc, aee 14 egn, l’era ti egn del 1955/56. D’invern de dì jie coi schi e da sera jie stroz co l’Ape a portar l pesc ai prumes alberghes de val. Semper te chi egn aló Aldo e Tullio che i fajea scola de schi sul Bondon i me à domanà se volee me scriver ite al grop sportif Soreghina de Trent. Peissa che mie prum arcedador l’é stat Corrado Pontalti e con chest grop che tolea ite touse da dut l Trentin, jiane a far garejade. La più bela per me l’é stat chela de l’Abeton, na gara internazionala ajache l’era ence touse todesce e svizre. L’era la “Coppa Femmina” son ruada quarta, mie mior ejit! Ere stolza!«

A Valentina ge sgalizea i eies a pissèr a chest bel moment.

»Sasto - la me conta amò - gio jie ben olache nesciugn saea chi che son, olache i me cognoscea me agitae e no ere bona de far de bogn ejic... desché canche son jita en televijion: me é pissà tanto chiò nesciugn me cognosc e endana duta la Talia me à vedù.«

E se grignon endò.

Maestres de la Scola de schi de Poza, 1967-68.

Can èste pa fat i ejames per doventèr maestra?

»Peissa - la me disc - del 1958 aee demò 16 egn e na dì é scontrà Willy Platter, me sà amò de l veder coi ciavei da ‘brillantina’, descheche i usaa n’outa. Emben l me à dit che l volea meter sù na scola de schi sa Vich e l me à domanà se volee jir a far la maestra. Ge é responet che no é nience amò fat l’ejam de arlieva. Enlouta se cognea far l’ejam per doventar arileva, dapò dò doi egn se podea far chi de maestra. Aboncont con gran ardiment é tacà a ensegnar da Nadal sul portoi del schilift de Valacin e sot la sentadoa de Vich. Aee n muie de persone, nience l temp de jir a magnar, l’era freit e l’era Marieta de la Pension Vigo che me portaa cà zeche da ciaut da beiver. No aee mondura, aee demò na ‘giacavento’ sotila, n pé de brae ence sotile e sotite le ciauze, me ciapae zeche giaciade. Dapò descheche é dit da sera jie a portar l pesc ai prumes alberghes de val e na sera aló da l’Hotel Rosa é scontrà Angelo Pitscheider che me à domanà se jisse a far scola ta Cianacei. Enlouta ere dò che fajee l’ejam da maestra forin Careza, son passada e peissete che te nosc grop l’era ence Cesare Maestri. Fin de 18 egn é fat ‘scola temporanea’ dapò l’é vegnù fora n concors de maestra spezializada per i bec da far sul Role, son jita e ence aló son passada. Coscita é scomenzà a far scola ta Cianacei, i me à dat la mondura, sci... l guant l’era mie i me à dat demò na picola stema.«

E chiò la se grigna.

»Più tart i à enjignà n maion de lana bruna e rossa desfata e fata sù danef, na ciameija de fianela a cadrac e na picola stema che me fegure nesciugn più se la recorda.

Aee zeche gran manice che me aea regalà n finanzier a la partenza de na garejada a Sèn Martin de Castroza ajache l’aea vedù che son zenza e se veit che ge é fat pecià.«

Donca ti es stata una de la pruma maestres de schi de Fascia?

»Ei, una de le prumes. Dant ere soula dapò l’é vegnù Renata Micheluzzi che aea fat le Olimpiadi del 1956 vin Ampezo e Renata Battel.«

Erel senester per te tousa lurèr con duc chisc omin?

»Gio no abadae, aee 17 egn, me sea bel jir coi schi, no aee tema de nia e de nesciugn. Ere na aventuriera! Peissete che pec egn dò col CAI é fat l Monte Bianco doi oute te doi dis! N’outa da la man de Courmayeur e l’autra da la man de St. Moritz. Me piajea da mac jir coi schi! Se l’era valch aventura da viver ere la pruma.

De 20 egn é didà a far sù la Crousc sun Sas Pordoi. L’era n grop de jogn del G.A.O de Rho che vegnìa en campegio te chi pré de Fraine via Pera e i à domanà de poder far sù la crousc. Emben na dì i é ciarié de 7 o 8 su la Topolino e i é mené enscin sul Jouf, aló aon lascià i feres per la crousc da portèr su co la teleferica e dapò sion jic su a pé ajache no l’era amò la forenadoa. Co nos l’é vegnù sù Renzo Casari de Ciurc a far l zocol. La crousc la é stata benedida da la Madona de aost del 1962 e del 2012 per i 50 egn chi jogn de Rho i me à envià su a fèr festa. L’é stat na bela emozion.«

Jon deretorn ai schi. Ta Cianacei olà fajeeste pa scola?

Ensegnae aló da l’alberch Faloria, su per chi pré l’era n picol schilift a ‘ancora’ (dopie) dapò jie ta Dalba dedant al Vitoria olache l’é vegnù ju la bisciaboa. Sot sera i me manaa fora Ciampedel aló da l’ofize di foresć, i me lasciaa mingol de post sun banch per tor sù le prenotazion e canche fenie jie a far l medemo ta Dalba aló da l’alberch Alba.

Trei egn é fat scola ta Cianacei e da sera jie ja Poza me tolee l’Ape, più tart na picola Topolino, e jie a portar fora l pesc da Fontanefredde a Ciantrujan. Aló da la Villetta Maria vegnìa i trogheres a se tor l pesc che duraa Iori sun Marmolada. Peissete che enlouta i ghesć i ruaa fin colaite, dapò i jia sun Fedaa a pe ensema ai trogheres che ge portaa le valisc. Auter che auti e forenadoe. Fajee duta la val de Fiem e Fascia, valch outa ere tant stenciada che me fermaae te auto a far n pisol.«

»Te chi egn - la me conta amò - aon scomenzà a far sù la boteiga del pesc, timpruma l’era doi vasche de zement con soraite na tieja de legn col fon de bree. Gio tolee sù le bree, ciapae le trote e le copae, dapò l’era na coronela co la stadia, le pesae e metee i scioldi te na picola scatola de carton.«

Valentina te sia pruma gara de schi a Larcioné.

Ge vèrde dassen maraveèda.

»Dapò aon scomenzà a far sù la neva boteiga e la ciasa. Ben, é lurà ence da murador. Fajee jir l montacarichi e la petoniera miec che mie fra. I sac de ziment da 50 chili m’i tolee su la schena desche se fossa n prossach. Canche aon avert la boteiga del pesc é cognosciù mie om Marcello Tarter che l’era vegnù a ne conciar na giacera e dò n trat se aon maridà. Enlouta son jita a far scola a Poza e i bec, Ornella e Graziano, me li vardaa via Manuela Marcon.« E chiò i eies de Valentina i se fesc mesties e colmes de encresciment per Manuela, che ne à lascià massa prest. »Mauro, l più picol, l’é nasciù canche no fajee più scola, se aane jà fat su la ciasa sun Chieva e aane la firma de giacere.«

Ge èste fat scola a ghesć de nonzech?

Te diré che no abadae. Me recorde demò che canche fajee scola sun Bufaure l’era l pare de n bez che vegnia a me tor co la Ferrari, ma no saesse pa chi che l’era, no ge l’é mai domanà. Ades che é vedù l jon Luca Isabella che l va coi schi me é vegnù tal ciaf che ge é fat scola a so pare. Che veste, da Nadal aee 25 bec e fajee scola vin Col da Pra, stajee aló da le 9 dadoman enscin le 5 da sera. Enlouta l’era Emma Locatin de Ciadin che me portaa zeche da magnar. É fat scola a Poza 13 egn e me n’à despiajù dalbon n muie lasciar aló. Me saea tant bel jir a Pampeago o su la Panarotta con Ettore Costazza, Aldo Gross e Tullio Gross a far le garejade per chi sora i 40 egn. Jir coi schi l’é semper stat na mia gran pascion.«

Dassen n muie bie chisc recorc!

»Speta che te conte l’ultima ma no la scriver! Mie giaf l’é nasciù te l’Abruzzo, i l’aea lascià te la roda de n convent olache i lasciaa i fantolins che no i volea o chi nasciui de trafugo. Emben i à lascià chest mie giaf con n bon pec de scioldi, coscita i l’à fat studiar e l’é doventà spion del bosch. L’à cognosciù mia giava che la era da Napoli Portici e i se à enciasà a Farra D’Alpago olache l’é nasciù mie pare. Mia mare la jia semper regolada col guant del Ciador e da beza la é jita a Unejia te piaz San March canche l’é ruà Mussolini. Emben i l’à portada sun paladina e l Duce l’à dit: »Questa è la vera rappresentante del Cadore!« Con mie pare i se à maridà a Laurana te la ex Jugoslavia olache l’é nasciù mie fra Vittorio e mia sor Giuseppina, dapò i à cognù sciampar perche se no i ruaa te le Foibe e i é jic a Frassené vejin a Agort, dapò i se à tramudà a Vezan olache son nasciuda gio.«

Ben, no podee no l scriver ajache chest l’é n toch de storia de na familia dassen da recordar soraldut per i jogn che i peisse sora a chel che à padì nesc giaves.

La ciacolèda con Valentina Rossetti la é stata dassen n muie piajegola e la ne à dat l met de descorir ence picola fregoles de storia de noscia val.

Donca detelpai Valentina e a n autra più bela!!!

Annelise Vian, La Usc 15 del 2021

»Jir coi schi l’é semper stat na mia gran pascion!«

Union di Ladins de Fascia