Chi érel , e soraldut che èl pa fat chest om da Poza, anzi podon dir sobito chest preve (chel “don” ve arà jà fat entener che l’era n religious) per se meritèr che ge vegne dedicà la strèda e la scola de so paìsc?

La informazions che podede lejer sun chesta piata les aon toutes da n articol, taà fora dal sfoi “Vita Trentina” del november de l’an 1942, che ne é stat portà te redazion da Renzo Deluca de Canucia da Vich; n articol “storich”, che era stat scrit ti egn de la seconda vera mondièla, e che Renzo l’à tegnù sù enscin anchecondì. Te chel articol - se sà ben con l stil de scriver de chi egn e con la pascion percheche la vera no era amò fenida, e i avenimenc reporté l’era fac de cronaca, e no de storia - vegnìa dat la burta neva de la mort eroica del preve fascian, e scrit vèlch de sia biografìa.

N preve eroich

Don Lodovico Gross l’era n Capelan Militèr, un de chi preves mané a portèr na lum de speranza e confort ai sudé en vera.

L’avis de sia mort eroica era ruà con na letra che l’Ordinarie Militèr de Roma, che fossa sche l Piscop de duc i Capelans militères, ge aea manà a l’Arzipiscop de Trent.

Don Lodovico Gross l’era en viac envers la Tèlia, canche l piroscaf, olache l’era embarcà ensema con etres sudé, l’é stat colpì da presciapech 200 metres dalonc da la canonèdes de n “sommergibile” nemich. Don Lodovico, ferì a la mans, l’é stat envià a arbandonèr l bastiment, ma no l’à volù se n jir, percheche no l volea lascèr soi i etres sudé. L’é restà apede ic a ge portèr confort ai ferii e benedir chi che era dò a morir, tegnan l Crist con la mans che sangonèa. Endèna che l compìa chesta azion de pietà cristièna, l’é stat ciapà dret tel piet da na patrona di nemisc e l’é sutà jù, mort de colp.

“Don Lodovico Gross – scrivea l’Ordinarie Militèr te chela letra – l’era un di capelegn miores de duta l’Armèda, soraldut per sia bontà e lezitenza, amà e stimà da si ofiziai e sudé.” E n auter Monsegnor scrivea: “Si sudé ge volea ben, e per l’educazion che l dajea, per l gran cher, per so spirit de pietà, l’era tegnù desche n sènt.”

Fosc no l’aea pervedù sia mort, ma de segur l l’à azetèda con cher datol, desche l sacro doer de n capelan militèr en temp de vera, se lec te chel articol, olache vegn publicà ence na letra scrita da Don Lodovico Gross l’an dant, ai 2 de oril del 1941. Na letra scrita a sia mère e sia sor Maria, da Fiume, l dì dant de pontèr via a pe con so regiment contra la Jugoslavia, olache l preve fascian se à troà per più dis te mez al fech de la batalia e l’à vedù morir n bon pec de si sudé.

“Ge vel ben n preve con nesc cari sudé – l scrivea. E amò – fosc l doman podarà ne domanèr maores sacrifizies, fosc l Segnoredie te sia misericordia l podessa voler ence l mie. E ben bolintiera son desponìbol a chest, content de poder ge sporjer a Die la vita che El me à dat, la sporjer per mie cari fanti, per la Patria che padesc la vera, percheche posse endò vegnir la pèsc, tant dejidrèda. (...) E se na dì, cara mère, ve ruarà la neva che vosc fi l’é mort, no pianjé, pissà che l’é mort n preve tel fèr so dover, e che l prearà per Vo...”

Mingol de biografìa

Nasciù a Poza ai 6 de november del 1912, Don Lodovico Gross del 1934 l studièa da preve, canche l’à lascià ló chisc studies per viver per n trat la vita de caserma. Chel ambient l’é stat per el n lech de apostolat, olache l’à ence enjignà n bon pec de sudé a la Pruma Comunion e a la Creisema. Chiò l’à madurà amò de più sia vocazion, e l’à renforzà so carater. L’é stat cernù, soul anter caranta, per jir a fèr la scola melitare de Modena e doventèr ofizial de cariera, e dò doi egn l’é endò vegnù de retorn te sie Seminarie de Trent per fenir si studies teologiches, e l’é stat ordenà preve da Pèsca del 1938.

Dò esser stat preve cooperator a Cembra e a Tassullo, del 1940 e del 1941 l’é stat rechiamà da l’eserzit e manà a Fiume, olache l’à ence ensegnà tel Seminarie. L’era Tenent Capelan del 25° Regiment de Fanterìa e l’é mort tel mèr Adriatich ai 5 de otober del 1942.

Lucia Gross, La Usc 02 del 2012

Chi érel Don Lodovico Gross?

Union di Ladins de Fascia