Jan Batista Deville, n Oskar Schindler ladin

»Chi che salva na vita salva dut l mond« l’é n dit che vegn fora dal Talmud, scritura sacra ebraica, e l vegn tras recordà canche se rejona di »Giusti anter le nazion«, chi che à salvà i ebrees da la shaoh. Un de chisc l’é Oskar Schindler, n imprenditor todesch n muie cognosciù soraldut de grazia al film de Steven Spielberg »Schndler’s List«, dal liber de scritor australian Thomas Keneally.

Oskar Schindler l’à salvà passa mile persone; ence noi te val aon abù nosc Schindler, che al scomenz del secol passà l’à portà a salvament presciapech 1500 jent. L’é Jan Batista Deville del Fregolin da Moena. Soa storia, massa pech cognosciuda, l’é una de chele storie proprio ‘da Nadal’, ajache la ne moscia la bontà de l’om. L’é na storia che à passa cent egn, ma la é semper de gran atualità, percheche amò anchecondì tel mond l’é n muion de jent, gregn e picoi, che cogn lasciar soa tera per colpa de le vere.

De Jan Batista Deville l’era stat scrit sun Nosha Jent, l boletin del Grop Ladin da Moena, del 2003, dò che l’an dant i studenc del Liceo Scientifich Leonardo Da Vinci de Trent, sot la spenta e l’endrez del dirigent scolastich Alessandro Dell’Aira, aea trat cà e traslatà per talian l liber »Back from Belgium – A Secret History of Three Years Within the German Lines«, dat fora da l’editor La Scuola del Ponte. Chel liber era stat scrit del 1918 per ingleis da don Giovanni Battista Deville enstes, per lasciar testimonianza de chi fac storiches sozedui entant la Gran Vera.

La soracuerta del liber traslatà del 2002 dai studenc del Liceo Da Vinci de Trent.

Sul boletin del Grop Ladin da Moena, del 2003, Fabio Chiocchetti scrivea: »Jent da Moena che se à fat onor fora per l mondo i n’é stat giusta teis, tant sti egn che più da vejin: artisć, insegnanc, letrè, scienziac, preves, miscionaries, magistrac, e duc merita de vegnir recordè. Ma chela de padre Jan Batista DeVille Fregolin l’é na storia deldut fora da le autre: l’é la storia de n om che per ge jir dò a sova vocazion, chela de far del ben a la pere jent, l se à troà dalonc da siöi paesc ciapà int ti fac de la Storia, chela con la “s” grana, a contat coi potenc de la tera e co le meserie de na guera furiosa e desperada, la Guera Grana.«

Ades chesta storia la ne vegn recordada da Alberto Chiocchetti Roch da Moena, che per l’aer cognosciuda l rengrazia Walter Deville Selèr e Maria Piccolin e per la meter jù l’à tout cà  l’à tout cà ence i articoi publiché da Alessandro Dell’Aira sul “Alto Adige” di 16 de november del 2000 e di 9 de jené del 2001.

Noi rengrazion donca Alberto Chiocchetti ajache dò sche 20 egn da enlaouta, e a 88 egn dal cedean de la mort de don Jan Batista Deville, podon coscì ge far cognoscer chesta emportanta piata de storia ladina e mondiala ence ai letores de La Usc di Ladins. LG

---

Na storia desmentiada

Chesta l’é na storia che è cognosciù percheche l Walter Deville del Selèr, me à parlà de chest so lontan parent e dat a dimprest n liber traslatà dal ingleis al talian te na scola de Trent tel 2002.

L liber el se entitolea “Back from Belgium – Storia segreta di tre anni dietro le linee tedesche”. L’original, scrit dal protagonist de chesta storia, l’é del 1918.

Giovanni Battista Deville, nasciù a Moena enlaoita Impero d’Austria e Ungheria tel 1873, l’é l prim de cinch fiöi de Giuliana e Giacomo Deville del Fregolin e de ciasa i stajea sunsom Piaz de Ramon. Giacomo Deville l’à na botega de òrc e siala e l fasc mingol l zipiador: ades de chesta familia no l’é piu nesciugn.

Jan Batista l vegn manà a Trent e pò a Roma a studiar da preve, ma per via de na delujion sentimentala del 1892 l vegn de retorn a ciasa. Ajache l’aesse cognù jir soldà, na not l scrif na letra per so pare, l va sun cortina a saludar so mare e l se fasc a pe fin a Falcade, po a Belun e da chigiò l va a Genova, da olache con giusta i pöc soldi che l’aea, co na nave l ruarà de giusta vint egn a New York, Ellis Island, na domenia ai 17 de oril del 1893.

Jan Batista l pensa de cogner se dar na endrezada per soa vita e l va a studiar tel Saint Bonaventure College de Allegany, na velgia università francescana dei Stati Uniti, e del 1897 l vegn ordenà preve a Buffalo. L fasc dodesc egn l paroco anter i minatores de la Pennsylvania, pò del 1909 l’é a Gary te l’Indiana. Dò l va a Hantington e dapò a Chicago per didar l paroco de Sèn Jan Berchmans, la Gejia de la jent vegnuda dal Belgio, e l vegn tot sù polito da chesta jent per soe doti de bon cör e per so cognom ladin, che l ge somea mingol al franzous De Ville.

Passa dotrei egn, e de l’aost del ’14 crepa fora la Gran Vera: mile e mile americhegn i é en ferie en Europa. Herbert Clark Hoover, che deventerà l 31m president dei Stati Uniti e che l laora desche ensegner minerarie te l’Inghilterra, da Londra l’aìda siöi compatrioc a se n jir a ciasa te la America, e semper per sova scomenzadiva l met sù aiuc alimentares per ge dar sostegn al Belgio che se à declarà neutral e che l vegn ocupà da l’eserzit todesch de l’Imperator Guglielmo II.

Hoover l met sù la Comiscion per l Socors del Belgio. Tropa jent del Belgio, jita a Chicago per laorar, met sù la sociazion »Belgian American Alliance« che se dasc jù per ge dar azet ai siöi che völ sćiampar da la Vera e jir dai parenc te la America. Te chesta organisazion se dasc da far l velge paroco de Sèn Jan Berchmans, olache l’é preve don Jan Batista, ladin da Moena.

Don Deville l’é deventà espert de giornalism, desche vizediretor del setemanal catolich “Our Sunday Visitor”, e ence espert de imigrazion. La »Belgian American Alliance« ge consegna na lista de jent e familie da cerir e portar en America. Father John ai 30 de aost del 1915 l monta su na nave da New Jork per Rotterdam. Per auter, jà del 1903 – oramai deventà american – l’aeva podù vegnir a ciasa a troar so pare, e dò del ’14 l’era stat te l’Inghiltera, te l’Olanda e tel Belgio a capir la situazion. Te chi egn jir co na nave l’era dassen pericolos: al prim de mè l piroscaf Lusitania l vegn silurà da n sotomarin todesch vejin a l’Irlanda, olache morirà presciapöch 1200 zivii.

Father Deville, co la vertola de esser qualificà desche »inviato speciale« del Chicago Observer, l vegn manà en Europa co l’enciarea de chierir e portar te l’America n mulge de jent e familie, soraldut popes e femene che sćiampava dal Belgio.

L cader biografich del preve da Moena.

Don Jan Batista, te trei o sie viac l porta en Olanda e dapò en America n mulge de jent: con gran fadìa e risćio per soa vita l’é bon de salvar sche 1500 persone che podarà se retroar con chi che i era jic a la foresta per se la vadagnar. Per far chest l cogn se la far fora con Belgi, Olandeisc, Todesć, Ingleisc e Americhegn.

Dal diarie de don Deville

Tole fora dotrei tòc dal diarie che nosc preve ladin-american l scrif per ge lasciar da entener a chi che vegnirà còme che l se à troà a far so dover de preve e de om.

»Per jir a me chierir la jent che aesse cognù menar en America son stat te trope zità, olache le feride averte l’era i segnes de n martirie. Sotint ciase crodade l’era n’assa de jent morta zenza rejon, omegn, femene e popes che no ge n podeva nia. Da chel che ere bon de capir, me saeva che i comandanc militares todesć i aesse dezidù de empiantar n clima de teror amò inant che ruar tel Paes, subit dò aver entenù che i belgi se aeva refudà de lasciar passar liberamenter i sudè todesć sun so teritorie. L Belgio l’é stat brujà e fat a toc per ge dar al mondo l’ejempie de la punizion che ge tociava a duc chi che se aesse metù de contra a l’armada del Kaiser.«

 Omegn de vigni età i vegniva deportè en Germania per laorar per i todesć.

»L numer di omegn deportè da Tubize l’é ruà a doimile. Braine-l’Alleude ge à jontà 800 omegn; se calcolea che l’é stat portà demez presciapöch 150mile omegn. Co na proponeta debota enjuriosa, zirca doicent minadores de Sain-Ghislain i é stac enviè a jir en Germania a laorar per l nemich. Chisc se à refudà duc chenc adum, coscita i é stac arestè e menè en Germania zenza poder saludar i parenc. Ruè en Germania, i aesse cognù cerner se laorar per i todesć o ruar te prejon, e enlaoita – desche paiament per so amor de patria – i é stac serè via.

La ciasa olache l’é nasciù, tel retrat publicà sul liber.

Cogneve portar en America tosac no compagnè, che i me aeva dat en consegna a mi. Apede a le autre dificoltà, ge voleva ence meter cura de chisc pere picoi. Ten n viac n’aeve beleche sessanta zenza parenc, dai doi a nöf egn. Dò trope sperdude ciapade per via che valgugn dei più picoi i descompariva e i se n jiva stroz da soi, è dezedù de pianificar l mistier e de i spartir fora anter a le femene del grop. Se na mare l’aeva dò un de siöi fiöi, ge n dajeve da rencurar doi o trei de chi che i viajava da soi. A le femene che i n aeva doi o trei de siöi, ge n dajeve n auter da vardar via. Beleche semper ste mare le era ben contente de se tor sù cheste picole encombenze extra.«

De firè del 1917, canche l’America l’à declarà vera a la Germania, don Jan Batista l va de retorn en America. El vegn rengrazià a la Casa Bianca dal President Woodrow Wilson. Tel ’18, de jugn, l publica a New York l liber »Back from Belgium – A Secret History of Three Years Within the German Lines«. Endana che l liber vegniva stampà Father John l va stroz per l’America, New York, Seattle, California, Nuovo Messico, Arizona, Texas, a far conferenze e tor sù soldi per l’organisazion »Oevre du Lait« del mons. Mercier, cardinal de Bruxelles. Finida ence sta enciarea l va de oita a Gary e l met sù scole e istituzion per jovegn, operai, purec e jent che vegn da autres paesc del Mondo

Endana vegn l 1929, i egn de la gran deprescion, con gregn problemes de soldi e l’economìa che va ju per na brea. Ai 25 de dezember del ’29 l se ciapa sù le ponte e l vegn portà te ospedal a Gary. Endana, giornai de nonzech dei Stac Unii i scrif che Re Alberto del Belgio, tel 1919, l ge aeva dat a sto om ladin che pöc cognosc – la »Croce dell’Ordine di Re Leopoldo II per alti meriti umanitari«. Dò trei mesc de ospedal l varisc e del 1930 mingol zomp e segur strach l va a Roma e dapò a Moena. Chigiò l stasc mingol de temp a l’Hotel Corona, da so parent Eugenio Deville Selèr, dapò l va a star vin Primier a Transacqua, da so sorela Maria che con so om i tegniva l’Hotel al Ponte. Tel Primier l’ultim dì del 1932 l mör. Trei dì do, so neó don Domenico Redolf l mena l vascel sun Role e dapò a Moena, olache l vegn sepolì te cortina e beleche deldut desmentià.

Alberto Chiocchetti Roch, La Usc 51 del 2020