Jan Batista Detomas de Pantalion (1804-1862)

Giovanni Battista Detomas l é nasciù a Poza ai 9 de jené del 1804. L é stat assistent maester de scola dal 1827 al 1857 ma soraldut l é stat pilèster fondamentèl de la musega te Fascia e fondador de la Musega da Vich, la pruma te val. Defat del 1820 Detomas à metù su la Sozietà di diletanc de musega, per “rendere più rispettabile e maestoso il culto Divino”. L era organist de la Pieif e l se à dat ju con gran empegn acioche chest grop, che del 1836 tolea ite 18 sonadores, posse aer strumenc e partidures per viventèr tant la zelebrazions liturgiches che i evenc de natura profana de la comunanza.

Per egn l à domanà didament a la Piovanìa e a l Imperial Regio Giudizie, l é stat bon de smaorèr l organich te gejia e del 1846 l à otegnù n contribut de 15 fiorins al an per i strumenc e n picol contribut ai sonadores.

La partidures tel archivie de la Musega de Vich moscia te chi egn n’atività da marevea te ciantoria: no l era toc scric da Detomas, ma l maester se dajea gran da fèr a binèr ensema museghes neves, les adatan da operes che vegnìa dal raion todesch e desfrutan sia amicizia con Matie Ploner, organist a Ortijei. Per merit de Detomas n muie de composizions del Ploner é ruèdes enscin a nos, conservèdes te l’archivie de la Musega de Vich e dapò tel Istitut Cultural Ladin. Jan Batista l é mort a Sèn Jan ai 15 de messèl del 1862 e l empegn de la familia Detomas a cef de la Musega de Vich é jit inant con l fi Pantaleon e l nez Vito.

[Biografia touta fora dal Almanach 2020]