Iaco Zanus (1679 – 1742)

Jakob Zanusi (Giacomo Zanussi ti scric per talian) l’é nasciù a Ornela, vin Fodom del 1679 e l’é stat n artist che se à metù al luster con gran nonzech soraldut a Salzburg, olache l’é stat pitor de cort e esponent de relief de la pitura barocca.

Sia operes e pèles de utère é te desvalives lesc del mond, ampò te la Tèlia e te la valèdes ladines chest artist, che fegurèa desche todesch, no l’era cognosciù fin canche l’é stat enrescì fora da Lois Craffonara. Sie nonzech se à slarià fora ence da nos del 2001, canche tel Museo del Dom de Salzburg ge é stat dedicà na gran mostra monografica.

De sia vita da bez se sà pech: fi de Jan Batista Zanus, n marangon fodom, jà da joen Iaco l’é a Persenon, olache del 1696 l’é col pitor de cort Nicolaus Weis. De sia formazion dal stel vegn ipotisà che l sie stat a Ciavaleis con Giuseppe Alberti; del 1705 l’é jà pitor espert a Salzburg, olache l marida la fia de Johann Martin Schaumberger, l maor pitor de la zità, da chela che l’à ben 11 fies. L doventa pitor de cort del Piscop de Seckau che ge aur i ujes di palac e de l’aristocrazia de Salzburg.  Dò la mort de pèrt de la pruma femena, l se marida con Maria Ursula Kastner, che ge dèsc etres 6 fies. L’à n muie de lurier, ge vegn comiscionà utères e depenc ence da etres raions e l doventa amich del pitor de nonzech Paul Troger. Ence tel Trentin l’é sia operes, al Museo Diozesan de Trent se pel veder l Sacrificio di Melchisedech.

Iaco Zanus mor a Salzburg ai 24 de dezember del 1742 de 63 egn.

[Biografia touta fora dal Almanach 2020]