Antonio Rizzi Poldin (1931 – 2017)

Nasciù a Vich ai 23 de aost del 1931 da Leopoldo Rizzi e Antonia Benvenuta Delugan, Tone l’é l fra più joen de Teresina, Giulieta, Francesco e Giovanni. Per trei egn l fèsc la Scola d’èrt, ma fin da picol ge sà bel soraldut lurèr a l’averta te ciamp e te pra chierian aventures e descorides e l ge va dò a la besties salvères, vardan de ge la fèr al vardaciacia.

Col fra Checo l’empèra a fèr l garber, con Giovanni l taca a jir a crepes: l’à 16 egn canche i rua sun Sas da le Undesc e del ’49 con n grop de etres rampinadores i met sù la Lia Krepes Vajolet.

Tel medemo an Tone passa l’ejam da menacrep e del ’50, semper col fra Giovanni l’aur na via da prum. No l’é la venta o l record che Tone chier tel jir a crepes, ma la descorida, che lo porta a orir passa 60 vies te la Dolomites.

Da no poder contèr l’é si intervenc de socors sa mont, e a cef del socors l se dèsc jù ence a livel burocratich, per otegnir obietives importanc. Ampò la vita de Tone Poldin no l’é demò alpinism: con sia femena Annamaria (Mimma) l’à 6 fies e l se dèsc jù ence te la penscion de familia, olache l porta n raport fon con l ghest. L se met a la leta ence per la comunanza, te l’aministrazion l’é conseier e assessor de Comun, l tol pèrt a la vita politica del moviment ladin e l met a frut sia cognoscenzes per arjonjer obietives bogn per duc.

L’ultim don che l’à lascià l’é stat l Museo mineralogich Monzoni, n regoi de minerèi dalbon straordenèr, frut de sia pascion per i sasc e per la geologia. L’é mort de 86 egn, ai 5 de dezember del 2017.

[Biografia touta fora dal Almanach 2020]