Hans Pescoller

Hans Giuvani Pescoller l é nasciù ai 20 de dezember del 1941 a Lungiarü. L à lurà desche secretèr del Comun de San Martin de Tor olache l se aea enciasà con sia familia. Sia gran pascion l é semper stat la natura e duta sia marevees: desche fotograf l era cognosciù demò no te noscia valèdes ma te dut l mond ence de gra a sie lurier de autor de libres fotografics. L é semper stat n gran amant de la natura, de la crepes, e de la vita, sie retrac documentea piantes e besties, persones e mestieres da zacan de la Ladina, segur n gran melaur de testimonianza e recort per la generazions del davegnir.

Sie titoi più cognosciui l é “Val Badia – Retrac y impresciuns” publicà del 1995, “Dolomites – pizes magiches” del 2002 dat fora ensema a Alfred Erardi, “Tera Ladina – Dolomites” del 2008, “Scincundes” del 2009 con Paul Erlacher e tinultima del 2013 l liber “Bergkristalle – löms sön tru”.

Te sia bibliografia da recordèr segur ence la publicazions che revèrda la letradura da mont, frut de sia pascion per chest mond, anter chestes la “Kleine Bergsteigerfibel” del 1974. Hans Pescoller l se à dat ju ence tel sozièl, desche president de la Cèsa de Paussa “Ojöp Freinademetz”.

L fotograf l é mort ai 6 de firé del 2017. Dut sie archivie fotografich, che tol ite passa 33 mile retrac l ge é stat donà da la familia a la colezions del Museim Ladin Ćiastel de Tor.