Guido Iori Rocia (1912-1987)

Guido Iori Rocia nasc a Penìa ai 10 de mèrz del 1912. Sie père l’era pitor a la foresta e canche crepa fora la vera con duta la familia l cogn se tramudèr fora Jian.

Passé chisc egn senestres, Guido Iori va a fèr l liceo a Maran e di egn ’40 l scomenza a se enteressèr al lengaz e a la cultura ladina. L se dèsc jù soraldut tel ciamp politich, doventan un di maores ativisć del moviment “Zent Ladina Dolomites” che l se bat acioche i ladins de la cinch valèdes i abie i medemi deric. Ai 14 de messèl del 1946 l tol pèrt, ensema ai treimile ladins, a la gran scontrèda sul Sela endrezèda per domanèr l’unità.

I obietives politiches no garata, e Iori ti egn dò l se dèsc jù per meter ensema n dizionèr e na gramatica per fascian e per binèr adum toponimes originèi e contìes de la tradizion fascèna. Dò i egn ’50 l fèsc pèrt de la mendranza del Comun de Cianacei olache l’é protagonist de n grum de batalies publichèdes ence te chela che é sia dreta creatura: l sfoi de cronaca e folclor local “Il Postiglione delle Dolomiti” che l met sù de otober del 1957 e l darà fora per 27 egn.

Del 1965 l’é anter i fondadores del “Moviment politich ladin” che se bat per meter adum duc i ladins e l se fèsc portaousc de la batalia per l recognosciment del Comprenjorie per Fascia destacà da Fiem. Guido Iori Rocia mor ai 9 de mé del 1987.

Informazions e retrat dal Almanach 2013