Vèlch retrat a testimonianza del Gran Fech de Grìes stat ai 12 de oril del 1912. (Liber Gries, Degasper - Mazzel, Frazion de Gries, 2011)

Ai 12 de oril del 1912, da mesanet, a Grìes l’é crepà fora n gran fech che te pecia ores à desfat béleche dut l paìsc. Per recordèr chesta desgrazia tant emportanta del davegnir de Grìes l’é stat endrezà desvaliva scomenzadives, pontèdes via da la volontà de Francesco Mazzel de l’Ors che, l’an passà, l’à publicà ence n liber rich de istoria de duta la comunanza de Grìes. Ge aon domanà de ne contèr coche la erastata.

Co éla stata enlouta, del 1912?

Francesco Mazzel: “La Frazion de Grìes à publicà l liber che l’aea volontà de recuperèr la storia del paìsc. Enlouta che siere amò President aee fat chesta proponeta de meter ensema l liber. Ajache Giochele l’era stat tel Comitat de la Frazion per 40 egn e ence president per 30, per la Frazion l’era stat n mudament n muie gran, e da pèrt mia donca l’era l besegn de cognoscer che che l’era sozedù tel passà. Apede a duta la informazions, l liber me à fat cognoscer ence la desgrazia maores che l’é stat, desche na levina te Val de Salei del 1827, olache l’é mort doi da Grìes, e dapò i doi feghes. A Ciampedel del Setcent doi gregn feghes, ma chi de Grìes i é stac amò più emportanc per l davegnir del paìsc. Dai documents, anter chisc ence chi troé e studié fora da Père Frumenzio Ghetta, vegn fora che l prum fech l’é stat ai 9 de aost del 1861 e l secondo ai 12 de oril del 1912, duc doi crepé fora dal medemo post. Chesta l’é jà na roba curiousa. Del 1861 l’era crepà fora da la cèsa de Simone Fosco, la medema cèsa e tobià olache l’é pontà via ence l fech del 1912. Chesta cèsa la era tel cianton de Sopera, che l’é chel grop de cèses giusta sot stradon, per se entener, sot l Chalet Valeruz.

Tel prum cajo, del 1861, l fech à fat dan ence a la gejia (la cigola e l cuert), tel secondo enveze i é stac bogn de salvèr la gejia. No se sà più che tant del 1861, se no che l’era 21 families che à abù dan e che enlouta, te duc i set comuns de enlouta l’era Vich che del 1857 aea comprà ite na pompa, ma se sàbencheperoracheiéstaca Grìes oramai l fech l’aea jà fat dans. Te chel meis de aost dapò, la jent de paìsc la era amò sa mont a fèr fegn (sa Pradel, sa Roa), no i era te paìsc canche l’é crepà fora l fech, e i à cognù corer jù.

L secondo fech enveze l’é stat amò più cert, percheche del 1912 auti n’era. Descheche vegn fora da la testimonianzes, del 1881 tel Comun de Cianacei l capitan di studafech, che enlouta l’era l fotograf Franz Dantone Pascalin, l’aea fat n cors per emparèr a endrezèr via i “sprizzetti”, la machines di studafech de enlouta. Donca del 1912, enceben che l Comun aesse abù chesta machines, no i é stac bogn de se endrezèr e les durèr, percheche l problem l’era che i omegn no i era te paìsc, ajache la dì de Sèn Giosef i pontèa duc demez per jir al lont a lurèr. Dapò enlouta l’é stat ence n problem per chi che cognea tegnir la machines anter Frazions e Comuns, ma chest ge volessa l studièr fora miec. Resta l fat che no l’é stat nesciuna pompa, l’é entervegnù demò chela de Dèlba vidèda dai preves e dapò l’é ruàence i studafech da Mazin, Pera e Poza. Duta informazions, metudes sul liber de Grìes e toutes jù dal liber contabol de la frazion.”

Co érela stata donca chel dì?

“L fech l’era crepà fora ai 12 de oril del 1912, da les 12.00. Dut con l numer 12. Apede che a esser scur, da chela testimonianzes vegn fora ence che chela l’era na net de gran vent e donca l fech l’à ciapà sobito la cèses apede e te pecia ores l fech l’é ruà enscin ló da Cèsa Marmolèda che l’é stat una de la pecia cèses a se salvèr. Mìngol percheche la era fata sù più de peton e dapò percheche i se aea entopà coran de meter fora lenzei moi sui barcons.

Te chi momenc aló l’era la femenes che fajea dut. Les aea tirà fora la mènies per l’èga ma no les era states bones de les ciolèr e donca i proèa a destudèr con calzedrìe de èga da se passèr un co l’auter e da petèr olache i podea. La dì dò, dapò i conta ence che l’era n gran freit e che l’era dut giacià.”

Él mort zachei?

“Na. Da na memoria de Simone Riz de Macoch se é vegnui a saer che demò na ciaura é restèda brujèda. I era stac bogn duc de se trèr fora l bestiam da la stales. Apede a chest recort vegn scrit che se à salvà la gejia, n pèr de cèses che les era mìngol più endò respet al paìsc e dapò duta Magoa ence se aló, descheche conta semper chesta memoria, l’é ruà via tizons de bronzes de chisc tobié, descheche n’é ruà sun Soracrepa e via per Majaré (olache l’é ades l parco).”

Colunes él stat la caujes de chisc feghes?

“Sibie del 1861, che del 1912 i é crepé fora percheche i ge à dat fech. Tel prum cajo, Père Frumenzio Ghetta de Martin, te na memoria del 1870, l conta che l’era stat n bez de 15 egn che aea ciapà 10 egn de perjon, ma l’é n muie senester ruèr a entener delvers coche la é stata. Del 1912 enveze l’é stat na certa Maria “foghista”. No dijon n cognom, ma la era jà cognosciuda te paìsc, percheche i l’aea troèda autra outes a dèr fech, per chest i ge dijea “foghista”. Me é documentà delvers, se sà che l’era stat na femena che ge stajea dò a BattistaLagnol, cognosciù da duc desche Tita Piasech (spion dal bosch e ence capofrazion de Grìes), ma che l l’aea semper refudèda. Fazile però chesta femena l l’aea jù ence contra autra jent e anter chisc l’era ence chi de Zerilo Riz de Macoch che stajea vejin a Tita Piasech, e che sun barcon i aea stram sech, fosc più sorì da ge dèr fech.”

Éla stata ciapèda?

"Timpruma i aea cusà Tita Piasech, percheche chesta femena la era ence n muie furba e a zeche vida se veit che la é stata ence bona de fèr creer che l’era stat Tita Piasech, donca te n prum moment l’era stat el a vegnir serà via, o amancol fermà per dotrei dis. Ence chiò no se sà delvers, ma dapodò, canche i à enrescì mìngol de più, i à capì fora che l’era stat chesta Maria “foghista”, e Tita Piasech l’é stat lascià jir. Mia ameda Francesca Mazzel me à contà che sui sfoes l’era stat scrit: “Rilasciato Battista Lagnol”. Enveze Maria “foghista” la aea stata serèda via, fin del 1920, te l’ìsola de Veglia, na ìsola de la Croazia, che enlouta la era amò sot l’Imper Austro- Ungarich.”

Él n event che à lascià n muie de recorc te la jent de paìsc?

“Segur, amàncol te chi più veies. Ence per l liber sion rué amò a tor sù testimonianzes.”

Ve èi contà vèlch de particolèr?

“Ei, per ejempie i ne à contà che chi che l’era al lont i à sapù doi dis dò che no i aea più la cèsa. Enlouta, del 1912, no l’era nience amò la lum, percheche l’energìa eletrica é stata portèda entorn l 1915. N auter aspet n muie burt l’era che doi egn dò, che l’era amò jent che cognea fenir de se fèr fora la cèsa, l’é stat la vera e donca i joegn é stac chiamé e ence chest à pesà sun duta la comunanza.

Dapò ence con la recostruzion à mudà mìngol l paìsc, se à mudà fora la proprietà de la cèses percheche chi che no é stac bogn de fèr fora i à cognù vener a autra jent.”

Estrat da na intervista de Valentina Redolfi, La Usc di Ladins 14 del 2012

Gran Fech de Grìes 1912 – 2012: na desgrazia che à mudà l paìsc

Union di Ladins de Fascia