Douces de ogne sort: grafons, grostoi, tortìe, pèc, bròce
De douces fac de pèsta rostida tel elech con o zenza levà n é de ogne sort no demò te Fascia o tel raion ladin, ma ence foradecà: bèsta pissèr ai turtles/tirtles con craut o spinat o a la furtaies, ma ence le bugie o i ravioli dolci de la tradizion talièna.
Aon proà a binèr ensema la variantes che l é chiò te noscia Val coi ingredienc aldò e aon tout su con nosc format SAERES coche vegn fat chi più sparpagné fora. Sessaben che dut no aon troà e che fossa amò da enrescir! Duc sà che na rezeta la pel mudèr no demò da paisc a paisc ma ence da familia a familia, donca chesta informazions che aon binà adum no les vel pa esser normatives ma demò meter ensema n gustegol rezetarie de referiment sui douces fascegn. Bon pro!
Marta Ghetta dal Ones, Erminia Weiss de Coz e Rosetta Dallapozza de Fucan enjigna la pèsta per fèr grostoi.
Grostoi (sm): se ge disc coscita te duta la val. L é chi sotii, delicac, chières e bie bienc de zucher a vel. I vegn fac da Carnascèr, dai maridoc, da la sègres, dai batums e da Sènt’Uiana. No i à ite levà. I ge met ite ence mingol de spirit, che sie sgnapa, rum o vin bianch, o aldidanché autra sorts de spirits aldò di gusć.
De grostoi n é ence de chi più grosc con ite marmelada: a chisc ja la Val de sot i ge disc tortìe.
Chi da Carnascèr i vegnia rostii mingol de più e i era più rosc.
Tortìe (sm): se ge disc coscita te la Val de sot. Fossa la pèsta di grostoi, lascèda mingol più spessae con ite marmelada desche i grafons. No i à ite levà.
I pel esser fac con ciarel, con spirit e ence con mingol de lat.
Se pel ence ge meter ite pomes de tera chec.
Genia da Parèda laora la pèsta di grafons.
Grafons (sm): se ge disc coscita te la Val de sora. I é de pèsta levèda, i vegn rostii tel elech, o tel specksmolz (strutto). I ge met ence ite spirit.
A desferenza di grostoi, se i magnèa ence da disdalaor, de giusta regola col orc, ma ence apede a supa da craut o da fajei. I vegnia fac donca più da spes e i tegnia più dur. I vegnia fac bensegur ence per la festes e la gran festes.
I pel esser:
da ueta o marmelada;
da anesc;
da civion e donca nia zucher ma na pizèda de sèl;
da clozegn;
da fighes;
da pàssui, che fossa de picoi reves che no i é rué a se fèr d’uton, magari sofoé dal semenà massa fit;
da craut, manco torons ma più lonc;
più da chièr, da pomes de tera.
Pèc (sm): se ge disc coscita sa Vich. Fossa de picoi grafons con ueta, levà e sgnapa. Se ge metea ite ence smauz delegà. S’i magnèa apede a n bon piat de orc o se s’i tolea do canche se jia a lurèr te ciamp.
Bròce (sf): da chel che aon podù enrescir, les vegnia enjignèdes demò sa Vich per Sènt’Uiana neva, ai 16 de firé. Se les fajèa levèr trei outes.
Les à na forma mingol più strenta che chela di grafons, belimpont sche la broces. Se ge metea ite ueta.
Aldidanché les é jites fora, fossa enteressant se zachei aessa amò la rezeta.
Rengrazion:
Christian Bernard Matel Ciampedel
Rosetta Dallapozza de Fucan Vich
Renata Dantone de Nato de Pacifico Dèlba
Marta Ghetta dal Ònes Vich
Stefano Ghetta de Martìn Vich
Assunta Merli Cianacei
Genia Pegoretti da Parèda Cianacei
Rosa Riz de Babi Ciampedel
Raffaele Rizzi de Teodoro Ciampedel
Erminia Weiss de Còz Vich
Vito Weiss de Còz Vich
Giuliana Zulian del Sester Soraga