Giuseppe Ghedina
Giuseppe Ghedina l é nasciù ai 25 de otober del 1898 a Cortina e l vegn amò anchecondì recordà per esser stat un di pionieres de la fotografia a Cortina. Sie père Giacinto l é stat l prum de la familia a se arvejinèr a chest mond, averjan ence l prum studie fotografich a la fin del Otcent aló dal Alberch Aquila Nera te Ampez.
Giuseppe l à studià dant a la popolères e dò a la Scola Industriala, olache sie maestres aea podù aprijièr sia gran braura per l dessegn. Chiò l à emparà ence a se frabichèr n pé de schi e a lurèr de tisler. Giuseppe l era atlet talian de schi, bob, alpinism e paslonch e l à dat n fort contribut per fèr cognoscer Cortina desche paisc de referiment per i sport da d’invern. L à tout pèrt ai prumes Jeghes Olimpics da d’Invern de Champonix-Mont-Blanc del 1924 olache l à tout pèrt ai 50 chilometres, seran su en dieijema pojizion.
Del 1918 l tol pèrt a la Gran Vera con la trupes di Kaiserjager: te la lingia di 684 combatenc de Ampez el l é l numer 639.
Endèna la seconda vera l à colaborà col Istitut Luce per tor ju la situazion sul front en Grecia e te l’Albania. Con doi compagnes l à metù su l ‘Cortina Film’, che en ocajion di VII Jeghes Olimpics de Cortina del 1956 l à lurà fora l film “Preludio alle Olimpiadi”.
Timpruma l fotograf l se emprevalea de la lastres e dò l é passà a la pelicoles, per tor ju i paesajes e la crepes più spetacolouses d’Europa. Ghedina l à semper aprijià l bel, la natura e sia marevees. I retrac “Ghedina” i à śirà e amò ades i seghita a śirèr fora per dut l mond.
Retrac che ne é stac dac dal nez Giuseppe Ghedina, omonim de fotograf, che rengrazion de cher!