Giovanni Rizzi de Poldin

Giovanni Rizzi de Poldin, cognosciù ence desche Giovanin de Grava, l é nasciù ai 11 de otober del 1920 sa Vich. Nia rich de cèsa, l à podù jir a la scoles autes del Arcivescovile de Trent e dapò l à studià derit a l’Università Catolica de Milan, olache l se paèa da stèr tel colegio Agostinianum dajan lezions de todesch. Endèna la vera, più che n’outa l à cognù fèr su e ju co la roda e dormir te la stazion Centrale per fèr i ejames. Do la vera l é stat un di prumes rociadores de valuta de Fascia, menacrep e anter i fondadores de la Lia Krepes Vajolet, prum grop de socors da mont.

Del 1950 l à maridà Elena Carraro, dita Mirella, da Noale (VE), che la ge à dat trei fies e set nevoes e la ge é stata semper apede, te cèsa e sul lurier, con sie fèr feruscol e grignolent.

Dal 1954 per passa 40 egn l é stat notèr a Vich: con sie lurier l ge à dat do al gran svilup de noscia tera e l à secodì i mestieres de sacotanta jent de la valèdes de Fascia e Fiem.

L é stat lità per doi outes ombolt de Vich, l se à cruzià anter l auter de la Scola d’Èrt e de la Scolina de Sèn Jan; l é ence stat president del BIM de Trent per 20 egn. Amò apede, l se à dat ju per l recognosciment e la defendura de la mendranza ladina: desche notèr, l à ence rogà l at ofizièl de fondazion de l’Union di Ladins de Fascia del 1955, do esser stat a cef de la sociazion ti prumes tempes. Om de fe e de cultura, de gran empegn tel lurier e de bon cher con duc, l é se n jit de 84 egn, ai 9 de marz del 2005 a Malindi, tel Kenya, olache ge saea bel passèr via l invern.