Franz Angel Rottonara

Franz Angel Rottonara l é nasciù a Corvara ai 3 de dezember del 1848. Fi del patron de la ostaria “Posta” jà da picol ge à semper sapù bel aer n lapisc te man per dessegnèr. L à studià a la Scola d’Èrt de Ortijei e a l’Academia de Bela Èrts de Minca.

De gra a n stipendium del goern austriach l é jit inant a studièr a la Scola d’Èrt de Viena olache, sot la vida di maestres Briosky, Burkhardt e Kautsky, l se à arvejinà a l’èrt de la decorazions, soraldut de scenes teatrèles e operistiches. Sie stil ge jia do a la moda de la “Gründerzeit” che se aea slarià fora te la gran zitèdes de l’Europa, na sort de renasciment caraterisà da imponenza e richeza de decorazions.

L à lurà per i più emportanc teatres del temp, da Praga a Turic, da Hamburg a Berlin. Sia operes é jites ence sorafora la seides europeènes, ruan te l’Americhes e ti paijes orientèi de l’Arabia, l’India, la Cina e l Giapon. Anter la scenografies enjignèdes l é segur da recordèr cheles per “La nozes de Figaro”, “L mercant de Unejia”, “Amlet”, duta cantes caraterisèdes da gran imaginazion e creatività feruscola.

L emperador todesch Wilhelm II l lo à nominà pitor a la cort imperiala de Preussen e l l à onorà con più medaes al merit.

L artist é mort del 1938 a Semmering vejin a Viena, a l’età de 90 egn. Te la Val Badia resta pec segnes de sia opera: l depent a fresch su la facèda de l’ostaria “Crusc Blanćia” a Sèn Linert e vèlch chèder al hotel “Posta” de Corvara, sie paisc nadalin.