Eleonora Riz de Janoto
Eleonora Riz de Janoto é nasciuda ai 17 de mé del 1929 e la é stata protagonista de la vita sozièla de Ciampedel. L’à lurà te scolina de Ciampedel e a la Stella Montis, olache l’à cognosciù sie om Pietro Canzi, la é stata te l’Azion Catolica e la ge à fat dotrina a n muie de bec.
L é stat la pruma femena de Ciampedel a ciapèr la patente, enceben la dejaproazion del père, e ence una de la pruma femenes a fèr teater: la pruma comedia spilenèda ofizialmenter l é stat “Cuor di schiava”, ensema con Olinda Riz de Federico e Rosalinda Favé de Stefin, timpruma demò per talian.
La ge tegnia che la joenes vae con l guant a la fascèna coche carenea, soraldut en ocajion de la sègra de paisc, da la procescions da Corpo de Crist e da la Madona del Rosèr a portèr l confalon de la touses.
L’à semper abù n fèr feruscol e inant sui tempes: te cèsa la ge dajea del “tu” a sie genitores e la jia con la roda e la braes ja Sèn Jan per fèr dotrina. La monies ampò ge aea cridà e no l’à mai più podù les aer.
L é stat na colona di Schuhplattler e la se à dat ju acioche vegne metù su l grop de la jent de età. Da spes la se cruzièa de endrezèr la baschies te paisc e da Carnascèr ge saea bel se trèr ite guanc veies e jir en mèscra.
La é se n jita ai 14 de november del 2019 a la bela età de 90 egn.