Francesco Facchini (1788 –1852)

Francesco Angelo Facchini del Pontera nasc ai 24 de otober del 1788 jal Forn de Moena. Do aer studià umanistica e filosofia a Trent, a Dìspruch e a Monaco, l va a studièr medejina a Pèdua, olache l se laurea del 1815. L taca a fèr l medico praticant a Milan e a Pavia, dapò l vegn de retorn te sia tera, luran dant forin Fiem e do te Fascia, a Moena e a Vich, desche medico de la jent e ence de la besties. L studia la caujes de l’epidemìa de malac e l spenc envers l’autorità acioche vegne metù en doura la mesures per la ferèr, ence travers n libret dal titol “Il tifo contagioso”. Gran cognoscidor de la erbes, l laora fora enstes la medejines per si malé. Del 1837 l arbandona la profescion medica per se dedichèr demò a la botanica. L publica scric su la piantes che se troa te noscia valèdes, colaboran a lurèr fora la gran regoeta “Flora Italica” de Bertoloni e sia osservazions ge fèsc vadagnèr la stima di studié del temp. L mor a Vich ai 6 de otober del 1852.