Ezio Anesi (1943 – 1993)

Ezio Anesi nasc a Cianacei ai 19 de setember del 1943. L fèsc studies de ragioneria e dapò l laora tel setor del turism, doventan diretor de l’Azienda del Turism de Cianacei e do de chela Fascia. L se dèsc ju te la vita politica e aministrativa te Comuns de Cianacei, de chel che l é dant conseier e dapò ombolt, dal 1990 fin a sia mort.

Sie enteress politich l lo spenc a se dèr ju per la cauja ladina: del 1982, canche nasc l’Union Autonomista Ladina, Anesi doventa l prum president del moviment.

Tel otober del 1983 l se candida con la UAL desche indipendent tel Partit Republican e l vegn lità: l é l prum fascian che rua te Consei Provinzièl. Te chi egn l laora per na neva clasc de aministradores e dirigenc, per valivèr i deric di fascegn a chi di ladins de Gherdena e Badia e per ge dèr unità culturala e zivila a duta la comunanza ladina. La lege provinzièla 17/85, che aea ciapà so inom, l é stat la pruma fontèna segura de contribuc e sostegn per la cultura ladina de Fascia.

Del 1988 per n pugn de stimes no l vegn più lità a Trent, ma del 1992 de gra al sostegn de sia jent, l rua a Palaz Madama: Anesi l é l prum senator ladin de la Republica. L an do l se candida endò per la regionèles, ma la net di 9 de november, a vegnir de retorn da na scontrèda de campagna litala, l ciapa l bot e l mor.

L é stat n ejempie per duta la comunanza: l se à dat ju per i joegn, per la scola, per l turism e per l hockey.