Cul da color, i camejoc nia neigres

I colores de la lènes moscia l gust de la fascènes per l color: neigher, brun, roan, vert o café.

Te mia rubrica inché volesse ve fèr pontèr l’eie sul color di camejoc e intene apontin chel del CAMEJOT, no chel de la bostina.

L camejot che va per la maora l’é neigher. L’é chel più classich, ma no l’é e no l’é mai stat conscidrà l più bel anter i colores che se pel durèr.

Colun él pa i colores che se pel durèr per l camejot?

I colores de la lènes moscia l gust de la fascènes per l color, ma ence l gust de fèr consonèr bostina e camejot. Chest l’é vèlch che va insegnà a la jona fascènes inchecondì, acioché no l vaghe perdù: l gust da zacan per un guant da se trèr ite aldidanché.

Te mia enrescides min é scialdi fat marevea de cotant particolar che l’é l gust de consonèr i colores te Fascia. Colores che somea no se consonèr nia neto, se consona e passenea per l’eie fascian e amedit se podessa pa zis rejonèr de “terapia del color”, de cromoterapìa.

Belimpont i fascegn i depenjea dutcant e tel depenjer sie mond i se lo imbeletèa, i se incercenèa de legreza ence canche de fora l’era dut bianch.

Coscita la fascènes durèa per ejempie lèna verdes per sie camejoc, de ogne sort de vert, dal vert muschie, al vert bosch, al vert mèrc e ence l vert vif. L camejot vert l’era conscidrà chel manco bel te na cèsa, aboncont a mi l me sà bel da morir, se posse dir la mia.

Eles durea ence lèna bruna per i camejoc: l’era l brun violet (dit ence pervinca), l’era l brun scur, più serious e elegant da poder portèr con ogne sort de gramièl e fazolet, e l’era l brun fascian, chel de la mobilia. Tinùltima l’era ence chel più eletrich, desche vèlch fior te pra d’istà. L camejot brun l’era conscidrà l più bel de cèsa.

No la é pa fenida chiò! L camejot café e chel roan ence fajea sia pèrt e n’era pa ence de chi de ogne desfacetatura; mìngol più scures e n goc più lumenousc, più ciauc o piutost freic.

---

 Che ge conseièr a na fascèna canche la se fèsc sie prum camejot?

Dighe “prum” percheche l’é da sperèr che dapodò l’abie tant revel gust che la sin fae n auter! Canche na fascèna se fèsc sie prum camejot, percheche no la n’à rità, dijesse de dezider per colores scures, neigher o brun, e chest bele percheche un camejot roan, vert o café o brun fascian la leassa massa con gramièl e fazolet.

L camejot che va per la maora l’é neigher, ma l’é demò un di camejoc che se usa te Fascia.

Purampò se la fascèna la disc che la osserva co consonèr i colores e la renunzia a vèlch gramièl che con sie camejot no stajessa ben, la pel benon s’impenentèr te l’aventura de n camejot dai colores forc. Seguramenter aboncont va metù vèrda al velù de la bostina e ence e soraldut al paìsc de naa de la fascèna. Se a la Penìes, sessaben, ge sà bel consonèr colores che crida, a la Ciampedeles e al rest de la Val ge sà bel passenèr colores che no crida tant revel.

Color su color: osservà de no fèr fascianèdes

No feniré mai de dir chel che insegne da egn a la fascènes de ogne età: ge vel ruèr a imparèr l gust per l color, zenza purampò fèr na fascianèda.

Canche dijon che la fascènes èa camejoc da color, chest no vel dir che duc i colores va ben per la lèna da fèr un camejot. Ge vel ge jir dò a la tradizion e soraldut conscidrèr che dapodò ède da ve tor ence l velù per la bostina e l gramièl.

Per la val de sora che porta l fazolet, important l’é fèr stèr ite te chest puzzle da color ence l fazolet.

Per l rest de la Val besegna osservèr che bostina e camejot staghe ben e che i gramièi rejone l lengaz del guant zenza descoordenèr dutcant.

L cust l’é intener che l guant complet de dut cant l’é n descors e ogne guant l’é n descors desvalif, ma te chest descors ogne toch à n sie post e l cogn passenèr col toch inlèngia, senó vegn na pozernèda. Ve sèl senester? Ge dijesse inveze che l’é faszinégol da imparèr.

ClaudiaConta, Te armer de la Conta, La Usc 38 del 2017