Chi mac egn 60
Ciauzes de nylon, colores impossìboi e nia ciufol. Tel retrat Paolina de Cont aldò la moda ti egn ‘60!
La moda e l guant
Interferenzes de la moda tel guant n’é sozedù ti secui passé e ence te chel’ùltim passà, l 1900. Fosc l 1900 l’é stat chel che se à mateà più che i etres col guant da zacan. Demò con fadìa se é stac bogn de tegnir sù l guant coche l’à da esser zenza l fèr doventèr na mèscra, n puzzle de revival de moda dal 1700 al 2000.
La rocia curtes
Ti egn sessanta, zachèi che me lec fosc se recorda, l’é la rocia curtes fin sa l cul, coche se disc per bon fascian, che les fèsc la patrones. Mai desche te chi egn la giames de la fémenes les era descorides, ence pa cheles de la bezes!
Roces de ogne sort, bèsta pa che se veide la giames e i jeneies! Nasc ence na neva forma, na neva silhouette coche se dijessa con na parola franzousa. La neva forma l’é l guant a trapez, curt curt e pech taà fora sul col, e ampò zenza mègnes.
La braa
Anter la neves de chi egn n’é una dassen importanta per nos fémenes. Zacan dutes nosautres femenes spodon se trèr ite na braa. Ve pissède aldidanché, bezes, se no podassane se meter na braa e no sin pèrla pa de n pé de jeans! Che melsorì che fossa, che dejèje, dijesse na TRAGEDIA! Imben inlouta soraldut i jeans l’era vèlch che dassen ge à volù se bater per poder i meter, nos fémenes, intene!
Ti egn ’60 ence la bezes ta Penìa moscèa giames e jeneges.
Aboncont l’era segur vèlch persona de età che inveze che ge jir dò a la idees de proibizion, i no vedea nia de mèl te n pé de jeans. Mie besaf Engel Rocia rechia da Cianacei n’outa ge á dit a mia àmeda: “po ben, beza, ben miec n pé de burta braes che na rocia fin sa l cul!” E coscita la é stata che ence te noscia familia dutes à podù se tirèr ite na braa!
La ciauzes de nylon e i ciavei cotoné
De chi tempes de moda jia se taèr jù la treces e se cotonèr i ciavei! L nylon, (parola metuda insema da Ny -New York- e lon-Londra) na invenzion de chi egn, fèsc bater l cher de ogne fémena ajache dutes les porta ciauzes de nylon, soraldut cheles color natural!
Femenes col guant a l’antica, ciavei curc e cotoné. Foto de Franz Pitscheider per liber Gries.
L guant da zacan de chi egn 60
Bon che l’é stat bele na evoluzion de passaje, ma la moda de chi egn al guant da zacan ge à fat trop mèl. La fémenes no portèa più l ciufol, donca nia treces da grana, les jia in cef nut coi ciavei curc e la pèrt più importanta del guant (i òres da cef) risièa de jir perduda per semper. No sin pèrla pa de la ciauzes de nylon che de chi egn les proèa a ciapèr la lèrga che se èa jà vadagnà tel cors di centenees la stìnfernes de lèna.
I colores di egn 60 i era scherdei e passené te na maniera, dijesse impossìbola, i colores fajea mèl ai eies, i cridèa. Coscita ence tel guant da zacan no se se cruzièa pa trop de passenèr con bon gust gramiel e fazolet. Inlouta per n trat se usèa coscita, bon che zachèi ge à dat de contra senó nosc guant no fossa più chel bel che l’é con duta sia valuta e segnificac sconec te vigni pìcol particolar.
ClaudiaConta, Te armer de la Conta, La Usc 18 del 2019