L’Union di Ladins de Fascia é dalbon stolza de dèr fora l Almanach 2021, ajache apontin chesta edizion de la publicazion festejea n bel cedean toron, ben 10 egn de vita!

Te duc chisc egn a ne compagnèr te chest percors retrospetif l é semper stat l artist fascian Manuel Riz che, con sie eie ironich e ite per anter ence critich e pizochent, l conta ence chest an te sia patofies i argomenc più emportanc o curiousc.

Apede troon ence la Piroles e na curta biografia de persones ladines. E per la pruma outa, te chesta edizion spezièla, troa gran lèrga la eles!

Per festejèr coche carenea l travert emportant chesta edizion porta dant 12 depenc a èga, un per ogne meis, de n auter artist fascian, Fernando Brunel, l President de la sociazion.
Per fèr amò più rich e de valuta l codejel, de gra a n QR code logà apedejù ogne crep, se pel scutèr na lejenda ladina che consonea, leta ju da n letor del post.

Autores: AA.VV.

L’Almanach l’é na publicazion che dèsc l met de contèr di fac sozedui via per l’an de gra ai dessegnes gustegoi e pizochenc de nosc caricaturist, nosc famous Manuel Riz da Cianacei. L lapisc de Manuel ne mena ence chest an a fèr memoria de vèlch aveniment particolèr de l’an 2019, fac che per solit vegn porté dant ence su La Usc di Ladins e che ge dèsc la spenta a nosc artist Manuel a i tratèr a na vida ironica, zenza mai ofener nesciugn, ma giusta con chel mingol de vena ponghenta che ne fèsc se grignotèr...

Desche da tradizion, ence su l’edizion 2019 de l’Almanach na piata la é dedichèda a la “piroles”, i fac en curt sozedui ogne meis e n cianton l’é resservà ai personajes, nesc bèrbesc rechies, che n muie i à dat a la Ladinia. La neva de chest an l’é la piata resservèda ogne meis a la sieves de legn che é states studièdes fora e dessegnèdes dai studenc del Liceo artistich de Fascia e che ve lascion descorir piata dò piata.

Autores: AA.VV.

Ge dajon na veièda a chel che l’é sozedù fora per dut l 2018, n an rich de avenimenc che à segnà, tel ben e tel mèl, noscia jent e noscia val. L fajon desche oramai da tradizion con l didament de Manuel Riz. Apede meton la “piroles”, i fac en curt, e na curta biografìa de persones ladines che à lascià sia pedies te la comunanza. Chest an aon abù l piajer de aer la colaborazion de doi scoles te Fascia. La scola de musega “Il Pentagramma” ne à didà a fèr più rich l’Almanach con la descrizion de 12 strumenc musicai e i studenc de la Scola Ladina de Fascia ne à sport si bie dessegnes. Ence chest’outa fenion fora con l’oroscop che ne rejona de magnèr e de auter no ve dijon, ve lascion l piajer de descorir piata per piata i contegnui de chest nef Almanach.

Autores: AA.VV.

Dessegnes: AA.VV.

L’Almanach de l’Union di Ladins de Fascia, ruà oramai a la sesta edizion, l’é semper più aprijià. Sun chest numer aon binà adum i avenimenc de l’an con la patofies de Manuel Riz. Apede chest la “piroles” ne recorda en curt i etres fac sozedui e na curta biografìa ne fèsc cognoscer personajes ladins che à lascià l segn te la comunanza. Chest an aon abù na colaborazion strenta con la Scola Ladina: professores e studenc del grop de robotica “Gome Neve” ne à sport i fruc de sie lurier sui ucìe. Fenion fora col gustegol e trefà oroscop per chel che chest an ne à didà Claudia Conta.

Autores: AA.VV.

Dessegnes: Fabian Mosele

La nona edizion de l’Almanach conta de n an nia deldut sorì, segnà da la parola Covid, chela magagna che à utà sotessora e mudà per semper noscia vites. Chela magagna che ne à fat entener l valor del temp, chel che aon passà seré via te noscia majons, chel che ne à portà demez na persona benvoluda, chel che ne à tout n braciacol ai giaves, chel che ne à tegnù per n an entriech te boles da color, a outes śales, a outes pomaranc, a outes ence checenes. A ve compagnèr fora per chest an l'é i fac metui dant da la Redazion de La Usc, na neva galarìa de personejes, la caricatures pizochentes de Manuel Riz e l viac te duc i sistemes de mesurèr l temp coi dessegnes de Ismaele Soraperra.

Autores: AA.VV.

Dessegnes: Manuel Riz e Ismaele Soraperra

Scouta l’intervista entrìa sun Ladinia Live de Rai Ladina

Te la quinta edizion de l'Almanach troède la patofies de Manuel Riz sui fac più emportanc sozedui te val via per l'an. Amò apede l'é la “pìroles" e na curta biografìa de persones ladines de nonzech; chest an dapò l’é ence i ortames da meter jù te Fascia a na vida sèna. Sun chest se aon fat conseèr da l'Azienda Agricola Soreie de Sebastian Ghetta e sia familia. Te l'ùltima piates l'é ence l'oroscop.

Autores: AA.VV.

Dessegnes: Manuel Riz e Laura Sanchez Ghetta 

Te la quarta edizion de l'Almanach de l'Union di Ladins de Fascia ogne meis l'artist da Cianacei Manuel Riz à dessegnà i fac più emportanc sozedui te Fascia. Te la piates che vegn dò Marco Detomas Pantalion da Vich ne conta de la erbes de nosc raion e amò apede ence chest an l'é la curta biografìes de 12 persones de nonzech de la Ladinia e la “pìroles” del meis.

Autor: AA.VV.

Dessegnes: Manuel Riz