TE STUA - Rassegna de cultura
Zacan, canche amò no l era l eletrico o l sciudament, la stua l era l soul post de la majon fascèna sciudà ite a legna. Se se binèa per fèr vila, do na lengia dì de lurier ti ciampes. Se ciacolèa, se sonèa, se zipièa la chiena. L era n lech de comunanza.
Aponti chest vel esser la rassegna de cultura Te stua, 4 scontrèdes fora de anter per rejonèr de cultura e tor ite i ghesć te la realtà tradizionèla fascèna.
La rassegna de cultura sarà enaudèda en mèrtesc ai 26 de messèl con la prejentazion de la regoeta de retrac Fascegn. Retrac de jent da zacan. La publicazion, data fora da l’Union di Ladins de Fascia, bina ensema più de 250 retrac da zacan, n viac tel Nefcent de Fascia. Co éla mudèda noscia sozietà? Colunes erel sia tradizions, i momenc de maor relevanza sozièla? Ma amò de più, chi érei i fascegn? Chestes e autra reflescions sarà argoment de la prejentazion.
En mèrtesc ai 2 de aost secont apuntament: l lengaz del guant. Endèna la scontrèda se rejona del guant ladin. Sun paladina vèlch cobia de camaric, con desvaliva sorts de guant, da Fascia e da l’area ampezèna. Colunes él sia carateristiches e si segnificac? Doi lesc de turism desvalives anter ic, ma leèdes tel fon da la Istoria e dal sentiment de Identità ladina. Sera en colaborazion con l’esperta Claudia Conta Dorigotti.
La rassegna va inant con n auter apuntament sul guant, ma sot n auter pont de osservazion, deldut inovatif e fora de anter: co mudel n ciapel te la tradizion fascèna? Na dejina de ciapie porta en viac l publich te n excursus storich-culturèl, a la descorida de la moda e de la vita del Nefcent de la jent de Fascia. En vender ai 19 de aost, apuntament semper en colaborazion con Claudia Conta.
Ultim apuntament en mèrtesc ai 30 de aost con na sera dedichèda al moviment di pitores fascegn, che del Otcent, e no demò, jia al Lònt per se la vadagnèr. Con sie colores e simboi i met ensema n’Èrt fascèna fora de anter: la stua cernuda per l placat l é chela de la Krimmler Tauernhaus, na utia tel Krimml olache i pitores da zacan i à lascià sia pedies. Apuntament en colaborazion col espert Fabio Chiocchetti e l artist Fernando Brunel.
Endrez
Duc i apuntamenc i vegn porté dant da les 21:00 aló da Piaz Marconi, Cianacei. Se sarà catitemp, l event vegn portà dant te Sala Conferenzes del Chino Marmolèda. Moderazion de Giorgio Pedron. Endrez de Nicoletta Riz.
Rassegna de cultura portèda dant da la sociazion Ensema per Cianacei en colaborazion con l’Union di Ladins de Fascia.