5° Simposie Toni Gross: èrt e sons te piaz
Poza / Sèn Jan – Dai 12 ai 16 de setember 2022 - Chest event, che vegn metù a jir ogne 2 egn, l é nasciù del 2012 per recordèr l zipiador e alpinist Toni Gross da Poza, stat ence ensegnant e diretor del Istitut d’Èrt de Fascia. Ades, a 10 egn da la pruma edizion (e na edizion del 2020 sutèda per Covid) l é stat dezidù de portèr n renovament, con la neva direzion artistica de Pierangelo Giacomuzzi. Fèr èrt, defat, vel dir sperimentèr e n simposie l é l’ocajion miora per fèr sperimentazion travers l barat de idees, de conzec, de strumenc, de materièi, de tecniches; l é na vida per evolver, con autra paroles na vida per crescer.
L é stat donca pissà de se averjer e l 5^ Simposie Toni Gross no sarà più demò scultura, ma l metarà ensema doi mondi: chel de l’èrt visuèla e chel de la musega. Artisć del legn e artisć del son lurarà ensema, en cobia, per realisèr dai 12 ai 16 de setember tel zenter de Poza, sot i eies del publich, n strument che se podarà sentir sonèr te na jam session con de etres sonadores a la fin de la manifestazion.
L 5° Simposie sarà donca “èrt e sons te piaz” e l tem cernù chest an l é “Surplus – de massa”: n argoment che ne tocia duc davejin te chest temp che sion duc cercené da fausc besegnes, e che se lea al conzet de scultura, olache la operes vegn fora dal legn tolan demez chel che l é “de massa” e a l’idea de realisèr a na vida scempia e ence con elemenc recuperé strumenc che pel dèr efec enteressanc e soscedèr emozions.
Tolarà pèrt 4 cobies (tolan artisć soraldut da la realtà ladina): l badiot Max Castlunger con Arianna Gasperina; Markus Gasser con Gianluigi Zeni; Peter Kompripiotr Holzknecht col badiot Tobias Tavella; Giorgia Marchetti con Guglielmo Bevilacqua.
No menciarà l laboratorie didatich de scultura di studenc del Liceo artistich de Fascia che i podarà se sproèr a zipièr (ic con la tecniches tradizionèles) dedant a la jent col didament de si ensegnanc, coordené dal professor Davide Deflorian, e i podarà ence se confrontèr coi etres artisć che tol pèrt al Simposie per aer neves stimoi culturai.
I artisć lurarà dal lunesc al vender te 4 postazions te strèdes e piac de Poza e da doman i podarà ence se emprevaler di laboratories de la Scola de Fascia se serf per sia realisazions. Ogne dì entorn les 6 da sera, vegnarà endrezà n moment de prejentazion, rejonèdes o performances musicales, se l é meso te piaz, col didament de la sociazion La Grenz che en vender ai 16 de setember la didarà a endrezèr l conzert-jam session coi strumenc realisé fora per la setemèna.
L event, apede ai 3 organisadores Union di Ladins de Fascia, Comun de Sèn Jan e Scola Ladina de Fascia, l à l sostegn de la Region Trentin Sudtirol, del Comun General de Fascia, de la Frazion de Poza e de l’APT de Fascia e la colaborazion de Enjoy Pozza, TREEFISTERS e La Grenz.
