Per l Comun general de Fascia e i Comuns de Val Dossier de l’Union di Ladins de Fascia per l Comun general de Fascia e i Comuns per rencurèr sù nosc teritorie e ge dèr maor valor storich.

1. Introduzion e motivazion:

L’Union di Ladins de Fascia, sezion de l’Union Generela di Ladins dla Dolomites, te si beleche 70 egn de fondazion, olache più che auter la se à cruzià de cultura, de nosc lengaz e tradizions, l’à tout posizion, soraldut tel passà, envers l’aspet urbanistich e no demò, ence sun chel speculatif che noscia val à abù ti egn dal 1970 en ca, enceben che no la sie stata per nia scutèda…

Con chest document dossier »Noscia Val de Fascia amò più bela« che l’Union ge prejenta ai Comuns e al Comun general de Fascia, l’é entenzion de portèr dant n projet documentà sun che che pisson che nesc aministradores aesse da meter sie empegn per ge dèr na parbuda miora al teritorie, richeza per duc i sentadins de noscia val.

Cherdon che sie costions emportantes che merita la conscidrazion del Comun general de Fascia, ritadin de la veiora e storica Comunità de Fascia desche Ent propositif e de coordenament anter duc i Comuns.

La documentazion é rica de retrac, fac via per l 2020 e l 2021 e de articoi documenté su La Usc di Ladins che revèrda l stradon de Fascia, l Jouf de Ciareja, l Jouf de Sela, de Pordoi e de Fedaa.

2. Curta storia de la Gran Strèda de la Dolomites e del monument sul Jouf de Pordoi datà 1904. La documentazion revèrda l monument en recordanza de l’inaudazion de la Gran Strèda de la Dolomites te l’an 1903 per no perder fora deldut noscia istoria. Curta cronistoria de Theodor Christomannos.

3. Articoi publiché su La Usc di Ladins via per l 2020 sui mures, pènts del stradon de Fascia, Jouf de Ciareja e Jouf de Sela: 2020-23, 2020-24, 2020-25, 2020-31

4. Retrac de nossec, pré no seé da egn che i fossa da rencurèr sù enlongia l stradon de Fascia. La documentazion revèrda nossec, pré no seé da egn che i aessa da vegnir rencuré con n coordenament anter i Comuns, i bachegn e se sà ben i privac. Fossa ben fat che ence i Comuns se tole sù l lurier e i se enjigne la massaria aldò.

5. Documentazion per enteressèr l Servije Strèdes de la Provinzia Autonoma de Trent per meter en segureza e fèr sù i mures sun dut l stradon de Fascia e sul Jouf de Sela (dant che sozede vèlch da burt). La documentazion revèrda retrac de mures en malester sul stradon de la Dolomites.

6. Domana che coi Comuns e la Frazions vegne metù a la leta di sentadins e del besegn di Comuns medemi, l legnam per fèr sù sieves, piles de lèrsc e de pin, brees de lèrsc e de pin che les tegn fora tel temp.

L’Union di Ladins à publicà l’Almanach 2019 belapontin sun chest argoment. Chiò se troa l studie de la desvaliva sorts de sieves fat ensema ai studenc de l’Istitut d’Èrt. Te l’introduzion vegn scrit coche vegnìa brujà la pontes de piles a Longiarù te la Val Badia a servije di bachegn e di sentadins de duta la val.

Con chest dossier l’Union di Ladins de Fascia no vel dèr giudizies de nesciuna sort ma demò n contribut per rencurèr noscia bela val. Sion a la leta per ogne schiariment o informazion.