L nef numer de Nosha Jent

Stimè letores,

ence chest an l’é dò a se finir, e coscita ence l’atività del Grop ge va encontra a n nöf mudament. L mandat portà inavant enfin ades l’é stat remetù te le man dei sozi e la radunanza ai 7 de november à provedù a nominar de na növa Direzion. Ve rengrazion de cör per voscia presenza, per el sostegn e la fiduzia che ne aede dat per jir inavant.

Troerede ence te sto numer scric, curgiosità e növe che averà l piajer de engejer ence i abonè foravìa. A ic ge va n recort spezial, percheche no i à mai fat menciar so vijinanza, ence se no i à semper podù spartir con noi de persona i bié momenc de chisc ultimes tempes, còme la festa canche l’é ruà don Gianni Damolin, còme nöf parroco.

Ne piasc pensar a sto fil sotil che ne lea, ence se stajon lontegn, spartii fora per el mondo da piz a cianton. Ne prem e ne fasc piazer sentir che tropes i speta ars de ciapar el boletin, ence se l vegn fora demò cater oite a l’an. Ne piasc pensar a jent che va e che vegn te na Moena che no völ desmentiar sove raìsc ma che völ respetar chele dei autres, na Moena che col turism à troà sova fortuna, ma che tel mosciar so bela mondura e siöi bié ciantogn, ge tegn a far cognoscer ence sova storia. Penson che l boletin de “Nosha Jent” l pode amò esser n element vif per nosc paes, na osc sćiantiva no demò per descuejer l passà, ma ence per viventar l present, col soscedar proponete e ocajion per descorer ensema de art, de cultura e atualità, per miorar e ge dar luster a noscia comunanza, a na vida che la pode vardar al davegnir con più fiduzia. Chest l’é ence nosc augurie, per voi e vosce familie, che l 2022 l porte a duc Pasc e Speranza.

Angela del Goti - Nosha Jent 4-2021