Ladins da duta la valèdes é rué col auto o co la coriera vin Badia en sabeda ai 24 de setember per l apuntament che dal 2014 vegn metù a jir da l’Union Generela di Ladins dla Dolomites e che chest an à abù desche pruma colaboradora tel endrez l’Union di Ladins de Fascia.

Da mesa les trei domesdì te gejia de San Linert la paroles de benvegnù pienes de gaissa de Siur Iaco Willeit à portà sobito na solistrèda te na giornèda mingol grija, e l president de l’Union Generela di Ladins dla Dolomites Antone Pollam à envià duc i ladins a tegnir adum e a preèr ence per la pèsc e l’à recordà la persones che à portà inant la cauja ladina e che anchecondì no é più con nos.

Dapò l president Pollam, con la vizepresidenta Milva Mussner e i presidenc o raprejentanc de l’autra Unions de valèda à pojà n fior e dit na orazion dedant a la fossa de Hilda Pizzinini, inant che peèr via en procescion.

Vidé da la Crousc e da la bandiera ladina portèda da Adriano Winterle, i ladins da duta la valèdes se à enarloà sul bel troi de la Via Crucis da San Linert envers Oies. L temp, che la previjions l dì dant dajea dalbon zomp, l à tegnù belebon e i pelegrins à cognù averjer la ombreles demò canche i era oramai sunsom. A lejer la orazions dedant a la stazions, jan do al libret »Na orazion sun l iade« l é stat a roda Pollam e i presidenc de la Unions o raprejentanc de ogne valèda: Fernando Brunel per Fascia, Milva Mussner per Gherdena, Annamaria Fiung per la Val Badia, Elsa Zardini per Ampez, Stella Palla per Fodom e Paola Agostini per Col.

N muie de jent, ence per via del temp malsegur, se aea endèna jà bina tel santuarie spetan la zelebrazion, che se à avert con la bela ciantia dedichèda a Sèn Giosef Freinademetz, adatèda per fascian e ciantèda con gran braura dal Cor di Joegn de Poza

Vidèda dal degan de Badia siur Iaco Willeit, conzelebrèda dal preve de Fascia don Mario Bravin e dal responsabol del Santuarie pater Franz Senfter, la zelebrazion l é stat dalbon n moment spezièl per duc i partezipanc, soraldut per chi rué da autra valèdes olache na scì bela messa duta per ladin i pel demò se la ensomeèr.

Siur Iaco, con sia gran comunicativa e sia bela paroles che à do e do vardà de tor ite e conscidrèr i ladins de ogne valèda, ence chi che stentèa mingol a entener l badiot, l à recordà più outes l’emportanza de portèr inant noscia fe e identità coche l Sènt da Oies ne à ensegnà e te la perdicia, aldò del Vangele sul rich magnares, l à recordà l benstèr de noscia valèdes, che ades co la crisa l scomenza a screvedèr, dijan che chest no cogn ne fèr tema, ma ne envièr a vardèr de più ai vejins che stenta.

Don Mario, che no l é de naa fascèna, l à let con gran braura dut l Vangele per ladin, i joegn ciantores vidé da Vanessa Tomasi à viventà duta la zelebrazion con cianties per ladin e per latin se vadagnan de gregn complimenc e raprejentanc:tes de ogne valèda à portà dant la orazions di fidei ti desvalives idiomes.

A serèr su chesta bela ocajion de devozion e de colaborazion interladina l é stat la letura de la poejia dedichèda al Sènt da Oies da man de Antonietta Crepaz (v. box apede), la paroles de rengraziament del president Antone Pollam e, desche semper, n picol marendel endrezà da l’Union Generela con la colaborazion de duta la valèdes, che à dat l’ocajion de cercèr vèlch da bon e carateristich e de stèr amò n moment duc anter ladins che i rua a se veder demò dinrèr.

Lucia Gross, La Usc 38 del 2022

Paroles e notes ladines sciauda l cher a Oies