»Nosha Jent« semper più rich

Va inant con bon ejit l lurier de la redazion, dut de volontariat, del boletin del Grop Ladin da Moena, che l an passà l à festejà l bel zil di 60 egn. Tel meis de jugn l é vegnù fora l secondo di 4 numeres de »Nosha Jent« pervedui fora per l an, n numer aprijià ence percheche, apede ai scric di componenc de la redazion, se troa desvalives contribuc da autre persone che deida a meter ensema na publicazion varia e rica.

Do l editorial de la presidenta Angela del Goti, dedicà al valor de la memoria, se pel lejer na bela intervista a Luca Senettin, president de la Banda de Moena, en ocajion di 170 egn che la sociazion à arjont e festejà apontin chest an. A la Musega e a sia braura, no demò a sonar ma ence a far coreografie, ge é stat dedicà ence la soracuerta.

Per ge dar larga a le neve generazion, la rubrica peada via chest an e dedicada ai joegn a la foresta ne prejenta chesta outa Amanda Tomma sini, enveze per la jent da recordar troon la storia de P. Tommaso Chiocchetti, miscionarie te la Cina, e i recorc de Dolores Dezulian, menciada da pech. Amò recorc, che doventa picoi toc de letradura, l é chi del diarie de scola de na tosata e chi del Molin de Sas de Meida, ajache da n trat »Nosha Jent« l é do a se averjer semper di più ence a duta Fascia.

La Giusy Zanoner del Menegon ge sporc ai letores na bela contia de n amor retroà »te n cest de bröghes«, e per la rubrica »Sport e sozietà« l president de la Monti Pallidi Carlo Ganz ne conta de l’atività de la sociazion tel setor de la brea. No mencia l »Sföi dai Jösc« con le parole encrojade del Marcelin del Cenchen.

Storia de amor e de fadie

Apede chest, l Grop Ladin da Moena, col sostegn de l’Union di ladins la é do a ge far aer chisc dis a duc i aboné n auter don. Dut é nasciù da la gran desponibilità de na femena da Moena, Isabella Iellici da Penia, che l’à azetà de contar e meter a la leta soa storia personala: la storia de na tosata cresciuda te n contest senester, che l’à sapù ge far front a le dificoltà, ma che la se à semper tegnù daite n grop, che ades la é stata bona de molar fora, per i sie de ciasa ma ence per duc chi vel lejer, e che i pel troar te soe parole no demò n ejempie che dasc speranza, ma ence n picol cader de storia e de letradutra ladina.

»Storia de amor e de fadie« l é n bel liber de beleche 100 piate, fornì con de bie retrac de familia, che se lec te n fià e che de spes l é bon de soscedar emozion fone.

Desche duc i numeres de Nosha Jent e le autre publicazion del Grop ladin da Moena, ence chest numer spezial ge vegn sport debant ai aboné, e a duc i sozi de l’Union di Ladins de Fascia che paa ite la picola integrazion per corir la speises de posta, o che domana de poder aer la publicazions en format PDF per mail. I enteressé i pel se oujer te senta de l’Union di ladins de Fascia a Sèn Jan o ai componenc del Grop Ladin da Moena. LG, La Usc di Ladins