La Via Crucis ladina, en recort de Ermanno Winterle

En ocajion del pelegrinaje de la parochies de Fascia forin Baissiston, l’Union di Ladins de Fascia à volù fèr endodanef la Via Crucis di Ladins.

Na ventina de persones se à troà da les diesc da doman al Masc Kehr de Neva Todescia e les é jites en procescion do la stazions, prean per fascian, aldò del libret che la sociazion aea dat fora del 2005, canche l’aea dedizù de restaurèr la veia Via Crucis jita bon a de mèl.

Ermanno Winterle, che l era conseier de l’Union, enlouta l aea vedù la condizion zompa de la stazions e l ge aea proponet a la sociazion de la meter a post: »Me é pissà che per recordar i 100 egn de l’Union Generela di Ladins dla Dolomites e i 50 egn de l’Union di Ladins de Fascia fossa stat bel far zeche che serve a la jent e a la fe, zeche che deide a lear le comunanze de rejonada ladina e todescia« coscita l aea dit enlouta.

Da enlouta ogne an Ermanno se à cruzià de la stazions de la Via Crucis, che les sie semper rencurèdes, che vegne seà dintornvia, che vegne metù a post l troi. E canche l era ora de endrezèr la Via Crucis per l pelegrinaje di Ladins l portèa fora vèlch fior per fornir su i capitie e l se cruzièa ence de endrezèr n marendel.

Ermanno ne à lascià ai 23 de dezember del 2021. L’Union di Ladins à volù fèr la Via Crucis en sie recort, prean per el e per duc i morc, ma soraldut per l rengrazièr per dut chel che l à fat per la endrezèr e la mantegnir tel temp. Su l’ultima stazion l é stat metù n fior e l é stat preà per Eni, che da Colassù l ne vèrde semper via.

Monica Cigolla