L'é ruà Nosha Jent!

L’é ruà chisc dis l prum numer del 2021 del boletin del Grop Ladin da Moena “Nosha Jent”. Te chest numer vegn recordà Giacomin Pettena, “el Chim”, che ne à lascià l’an passà. Ge vegn dat luster al lurier del compositor moenat Luigi Canori e na veièda a l’atualità. La sezion arteletradura ne porta dant poejìes, se va endò tel temp con recorc e scric. Tinultima semper aprijièdes la sezions de “Olà sione po?” e “Sföi dai jösc”.

Tel prejentèr chest numer, la presidenta del Grop Ladin scrif coscita te l’Editorial: “Nosha jent” l’é n boletin che no conta bujie e “gossip”, el conta de vita e de storie passade e dal dì d’ancö, el völ recordar e recognoscer i meric de chi che l’é se n jit e de chi che, ence tel volontariat, à dat trop e seghita a sporjer so temp e fadìe per miorar noscia comunità; el völ ence soscedar discuscion, e per chest l’é avert a duc chi che völ se dar jù o contar sove esperienze, averjer l cör con rime e pensieres fogn che ne aìda e soleva l spirit e miora l’umor. Volessane che fosse per voi de picole lum che pol miorar vosc viver e che, tel lengaz de la mare, podessade troar chel bel calor de vosce raìsc.”

Se ties abonà a Nosha Jent l te vegnarà portà o manà a cèsa. Te pes passèr a te l tor te senta de l’Union di Ladins de Fascia a Sèn Jan.