"L manual de la 50 aventures" l é nosc nef liber per bec per ladin!

Enstadì l’Union di Ladins de Fascia à dat fora n nef liber dal titol “L manual de la 50 aventures da viver dant di 13 egn”. Se trata de neva publicazion traslatèda dal original talian (edit Il Castoro) scrit da Pierdomenico Baccalario e Tommaso Percivale, doi di miores autores taliegn per bec e joegn di ultimes egn, con i dessegnes de Antongionata Ferrari.

La scomenzadiva la é stata pissèda dal Consei de la Sociazion, acioche se posse ge sporjer a duc nesc bec n nef liber per ladin, che l sie dantdaldut gustegol da lejer, ma che ampò l posse esser ence n compagn de tropa aventures da descorir coi amisc dut l an, a l’aria averta, de dì e de net, tel bosch e fora per la strèdes de paisc (e trop de più!). Belimpont l é chest l contegnù de la 50 aventures che l liber envia a tor su, con apedejù enteressanc consees per la letura e vèlch picola encèria da ge fèr front (desche tachèr su la piates del diarie vèlch foa, dessegnèr trei nigoles e l igloo che se à fat - e trop de più!).

L liber l é stat dat en don chisc dis ai partezipanc di laboratories da d’istà de Fascia. I bec e i joegn che tol pèrt a Istagran Sela e Ciadenac, Cistà e Istà Algegra durarà ence chest diarie te sia ativitèdes, ge jan do a la aventures che vegn portà dant!

La publicazion la é stata traslatèda per ladin da Nicoletta Riz con la revijion de Monica Cigolla, Cristina Marchetti e Nives Iori e la é stata publichèda da l’Union di Ladins de Fascia sul Pian de politica linguistica 2023 del Comun general de Fascia. L liber l é da troèr te senta de la sociazion.