L »genius loci« ladin te piaz a Sèn Jan

»Dò l troi de la reijes ladines. Angern, anché e doman: scontrèdes e confronc dintornvia la cultura ladina«: l’é chest l titol cernù chest istà dal Comitat Manifestazions Enjoy Poza con la giornalista Virna Pierobon, che jà da vèlch an se cruzia de la scontrèdes del lunesc sera. N titol che passenea patoch con l protagonist de l’apuntament di 2 de aost, canche a rejonèr te Piaz de Comun de Sèn Jan l’é stat envià Fernando Brunel.

Travers la domanes de Virna Pierobon e i video e retrac metui dant sul gran scherm, cercenà da si depenc, faceres, e libres, Brunel à podù ge sporjer al publich, che mescedèa ghesć e jent del post, n chèder a 360 degrees de la cultura ladina. Chela cultura sćiantiva che vegn da l’enteress, la cognoscenza, l’amor per dut chel che à a che fèr con la tera olache se é nasciiui e se vif.

La giornalista à definì Brunel esponent segnificatif del »genius loci« ladin, e defat l president de l’Union di Ladins de Fascia à rejonà de la sociazion che, ensema con l’Union Generèla di Ladins dla Dolomites (de chela che el l’é vizepresident) e con l’autra sezions de la valèdes entorn al Sela la se cruzia da passa 100 egn de stravardèr e viventèr l lengaz e l’identità ladina. Ma l’à rejonà ence de chela vocazion artistica che à portà Fascia a aer la Scola d’èrt desche pruma perferida de formazion auta, che Brunel à arfià da joenet e no l’à mai desmentià, tant che amò anchecondì tel jir fora per la Dolomites l se lascia ciapèr da la beleza de crepes e bosć enlumené da l’èlba che crepa o dal soreie che fioresc. Jir stroz, a pe, con pas asvelt e segur ma zenza prescia, se tolan l temp per vardèr, pissèr, rejonèr con la jent, l’é n auter aspet de la vida de n om da mont ladin de se reportèr a sie ambient. L’é chel che Brunel à moscià ti sacotenc filmac »A spas per la Ladinia«. Ence de chisc l publich te piaz à podù aer na cercia, e l’enteress à abù la venta sul tempram freit e ence sun vèlch gocia de pievia che da vèlch ora à tacà a vegnir jù.

La jent à desmostrà enteress ence per la publicazions ladines a la leta: i trei libres »A spas per la Ladinia«, ma ence »Mie istà sun Tamion« sun si recorc da pèster joenet, coi bie retrac che à dat l’ocajion de portèr te Piaz cerces su la storia, la usanzes e la vita de n’outa te Fascia. E amò l prum liber, chel »Imprescions« che regoi poesìes de autores de duta la Ladinia con si desvalives idiomes, compagnèdes dai depenc a elech o a èga de Brunel.

La pissèda de chest istà de sporjer cerces de cultura ladina sćiantiva se à donca desmostrà garatèda e la jirà amò inant. Dò la sera di 9 de aost, dedichèda al mond de la roda con la prejenza de Norma Gimondi, la cultura ladina sarà endò protagonista con la esposizion di retrac de Gustav Willeit te Piaz de Comun, olache ai 16 de aost l fotograf badiot sarà compagnà da n’autra artista de nonzech de la medema Val, la poeta Roberta Dapunt, per portèr l ghest ence sul troi de l’anché e del doman de la cultura ladina.

Lucia Gross