Canche se jìa a seèr co la fauc

Va inant l projet de l’Union di Ladins ‘Saores de noscia Tera’ portà dant tel chèder de l’Aisciuda Ladina, con l’obietif de tor ite la comunanza te n percors de enrescida per cognoscer noscia tera e si prodoc.

Dò la vijites a la firmes Fiores a Sèn Jan e N’Outa a Ciampestrin, en jebia ai 8 de messèl l’é stat la terza scontrèda che à menà i partezipanc a fèr na raida endò tel temp a la descorida de na atività tipica del passà: l president de l’Union di Ladins Fernando Brunel defat à contà e moscià coche se sea l pra a man con la fauc, na pratega che la é stata mingol arbandonèda percheche anchecondì l’é la machines per seèr.

Brunel à fat veder i èrc che i bachegn durèa e i movimenc segur da gran fadia ma ence bie e armoniousc che noscia jent n’outa fajea ogne istà, ge jan dò ai ritmes de la natura.

L’apuntament l’era da mesa les 9 da doman aló da l’Agritur Soreie a Soraga e dapò se é ponté demez duc ensema per ruèr sun Cigolin, olache l’é la tieja del president e apede l pra da seèr.

Tel spazie fora da la tieja l president onorar Antone Polam à moscià coche se bat la fauc, na azion che se pel l fèr ence demò col didament de la piantela, n èrt che se pel se tor dò ence te pra. Brunel enveze l’à moscià coche se pel schicèr fora la fauc sul banch da bater per drezèr polito la lama. Dapodò l’à fat veder coche se la guza con la pera che se tegn te codé, ciolà te la centa de la braes, con ite aga e sencajo ence mingol de ajé.

Dò aer endrezà la fauc, ensema con Franco Ghetta i à tacà a seèr, l’é stat dalbon bel scutèr l son de l’erba che vegnia taèda e veder i movimenc coordené e lijieres, per fèr de bie cianevèi (o andogn, descheche i disc a Soraga). Parea che seèr no sie nia sfadious ma se sà ben, no l’é coscì e defat se à ence podù se sproèr te chesta atività e se render cont che no l’é dalbon nia da sorì!

Dapodò l’à contà mingol coche l’era la giornèda del seador, che tachèa entorn les cater da doman, canche l’é amò la rosèda, ajache l’erba cogn esser mola ma no massa, da les 9 l fajea mez mesdì e l jìa inant col lurier enscin les 10 o les 11. Dò aer seà l trajea fora i cianevèi con la forcia da spaner e entorn la una o la does l’utèa l fegn contra soreie percheche l sece polito. Fernando l’à ence fat a saer che per seèr n pra de 1 etar, 1 etar e mez, ge volea trei omegn e doi giornèdes.

L temp chela dì no à didà n muie, defat dò l’à tacà a piever: »canche pievea l’era festa da mont!« l’à dit amò Fernando, coscì i partezipanc se à tirà te tieja e i à podù fèr na cercia del mez mesdì del bacan: patac fora da la schiufa con formai e pan e n bon bicer de vin. Enceben i vic del temp l’é stat na esperienza particolèra e piajégola en bona compagnia, che chi che magari no aea mai vedù seèr segur l’à aprijià.

Cristina Marchetti