Terza scontrèda per “Saores de noscia Tera” ai 8 de messèl
L’Union di Ladins de Fascia sostegn la difujion del lengaz e de la cultura ladina e da egn la fèsc pèrt de l’endrez de l’Aisciuda Ladina: la sociazion porta dant chest an l percors de laboratories “Saores de noscia Tera”
L projet “Saores de noscia tera” l’é nasciù per tor ite la comunanza de Fascia te n percors de enrescida curious e inovatif a la descorida di prodoc de noscia tera.
En mèrtesc al prum de jugn via per l domesdì l’é stat la seconda scontrèda de »Saores de noscia Tera«. I partezipanc à tout pèrt con enteress e dassen tantes l’é stat la domanes de curiosità outes ai esperc. La scontrèda é stata vidèda da Sara Desilvestro de l’azienda N’Outa de Ciampestrin e dal chef del restorant da Tamion L Chimpl Stefano Ghetta.
Te n prum moment Sara l’à vidà l grop fora per l bosch, pontan demez dal troi per jir te val de Dona per passèr sorafora l paìsc de Mazin e ruèr aló olache rua a val l ruf de Udai. Sara l’à contà de piantes, erbes e èlbres desvalives, soraldut de cheles con calità alimurgiches, che pel vegnir magnà sora desch. Se se à tramudà dapò duc ensema te si ciampes, olache l’é stat prejentà en curt la bièves jà semenèdes e che giusta ciutèa: en cont de chest argoment vegnarà endrezà n enconter de aprofondiment per chest uton semper per la lingia »Saores de noscia Tera«.
Retrat da l'archivie de l'Union di Ladins de Fascia - de Carletto del Baila
L’é ruà dapò l moment del chef Stefano Ghetta, che l’à spiegà, dessema con Sara, la particolarità de la farines de produzion N’Outa: »L’é n prodot deldut natural: per enjignar i medemi biscoc, duran chesta farina, ge vel meter beleche l dopie de aga, respet a la cantità che ge volessa a durar na farina da supermarcià«. Se à dapò rejonà de levà mère e de pan e i partezipanc à podù enjignèr de bogn biscoc da cercèr e dapò se portèr a cèsa. Endèna che chisc i chejea te forn, l’é stat cercià ence sciropes e rejonà de lin e senape.
Duc i partezipanc à palesà n fort aprijiament per la desponibilità e la cognoscenza di doi esperc che é entervegnui. Più che na persona à sotrissà coche l’é zis bel veder la gaissa de na joena desche Sara, de jir a descorir da nef i aspec de la vita da bacan de enlouta.
Te la terza scontrèda, perveduda ai 8 de messèl da les 8:30 dadoman - da sburlèr en cajo de catitemp -, sarà Fernando Brunel a ne contèr de coche se lurèa enlouta te ciamp. L’enconter se l farà a l’averta tel respet de duta la normativa sanitères.
Per ve enscinuèr podede ve oujer a noscia senta al 0462/764545, al 340/7765522 o manèr na mail a noscia direzion union@ladinsdefascia.it dant di 7 de messèl. Numer partezipanc limità. Sion atives ence sun nesc canai social Facebook e Instagram e da anché ence sun WhatsApp (0462/764545). Per tor pèrt no vegn domanà nesciun paament ma se volede podede sostegnir l’atività de l’Union dajan na bonaman.
(Enscinuazion singola per scontrèda)