A Moena la Festa del Rengraziament
N bel ciel brun, zenza na nigola, à encornijà la Festa del Rengraziament de l’Union di Ladins de Fascia, en domenia ai 10 de otober a Moena.
La giornèda é stata averta da la messa grana te gejia de Sèn Vile zelebrèda da don Bruno Daprà, cercenà sun utèr dai servidores e da la bandieres di gropes, Folk de Soraga, Musega Auta Fascia e Scizeres, che à solenisà con sia prejenza la festa. Na zelebrazion n muie rencurèda, ti segnes, te la paroles, la letures e la orazions dutes per fascian de don Bruno, te la cianties religiouses del componist da Moena Luigi Canori portèdes dant da la Corala Sèn Vile, col Salm ciantà da Angela Chiocchetti, e da la sonèdes de la Musega de Moena che à ressonà daite e defora de gejia.
La Festa del Rengraziament chest an é stata dedichèda a la scola e coscita ence te la perdicia don Bruno à volù fèr referiment a chesta istituzion. »Con la pandemia la scola é stata particolarmenter penalisada – l à dit – segur la didatica à padì, ma soraldut la sozialisazion anter studenc, l se vardar ti ölges, l se contar, l spartir le amicizie, l grignar e l sgherzar ensema, l far festa. Ades la scola pol vardar al davegnir con növa speranza. E de chest cognon rengraziar l Bon Die, l personal de la scola, i dozenc che à la responsabilità de garantir l pan de la cultura, l companadech del saer, de la enrescida e la saor de la descorida.«
Con la procescion ofertoriala l é stat portà sun utèr, apede a la bandiera ladina e l pan e l vin, la lanterna desche simbol de la lum de la fe, de la rejon, di valores umans e spirituai che ne à tramanà nesc aves e vèlch liber e n computer, i strumenc de la scola che ne permet de smaorar i orizonc del saer, del cognoscer, de la verità. »Dane, Segnoredio, la sapienza del cher« l é stat l’orazion che se à levà forta endèna la funzion, percheche descheche l é stat let con la pruma letura: »dut l or a so confront l é desche mingol de sabion e desche loca vegnarà stimà en confront a ela l arjent«.
Na messa che à uzà fora la fe, l lengaz ladin, la scola, valores emportanc de noscia comunanza.
Dant de la benediscion Marcelin Chiocchetti à let ju la orazion scrita da don Bruno »Tegni empeà chel lumin« e la Corala vidèda da Valentina Zanon à entonà »A la Madonina del Vaiolet« del Canori con la jent te gejia che à ciantà dò con gran emozion. Dò messa, te piaz tedant Oratorie, la Banda à portà dant dotrei sonèdes, vidèda dal maester Roberto Silvagni, e l à fenì su con l’In Ladin.
Monica Cigolla
