L fazolet da spales se l porta da Mazin in ite col guant a la fascèna!
Vardà che l fazolet sibie amancol 70 per 70, l é la mesura minima.
I bec porta fazolec più picui con panela curtes, chi da meter sotite la bostines o desche fazolet da col per i òmin.
I fazolec da diendl lijieres lijieres no l é fazolec da fascèna!
L fazolet se consona scialdi con gramièl e cordela.
Su la schena, l fazolet no à da esser lènch, la paneles del fazolet no cogn corir la cordela del gramièl.
La paneles del fazolet no à da esser massa lènges.
L fazolet no cogn jir sorafora la spales.
Dedantjù, l fazolet pel vegnir incrojigià aldò del besegn o de la parbuda.
L fazolet mingol sorapeà fèsc na vita più sotila.
No durà voies da sposa grosses, che forède la seida del camejot, durà voies da pomel lenges e sotiles a impontèr te bostina.
Che sort de fazolet e can?
N é de seida, de mesa seida, de lèna e dapodò l é i mec fazolec de velù. L fazolet de lèna e chel de velù se l pel portèr ence col corpetin da la pruma domenia de otober (sègra del Rosèr) a Corp de Crist (mé/jugn).
Can portèr l sciaudaènema?
Se l porta impontà sun corpetin da d’invern, se l imponta incrojigià dedantjù e se l ingropa su la schena.