L camejot: ingaidà l camejot do l aer durà, no demò canche l rencurède te cassabanch. Se l durède ogne dotrei dis podede ence l rodolèr fincanche l metede più da chièr. Per l neteèr, sbroscià ju l camejot con èga e ajei e lascialo sièr, dapodò engaidalo ite. Canche l rencurède, ujé fora la bostina che l daite ve vèrde: fajelo ite te n lenzel.

La ciameija: lavà fora la ciameija, tel bianch, te la machina da lavèr canche fajede lesciva o ence bele a man. Encolà i bechec, soraldut se i é lenc; i bechec no cognessa mai sconer dutacanta la man. Soprescià la ciameija giusta DANT de jir col guant, se jide n muie vardà de n aer tras una injignèda.

La soteviesta e sotebraa e davantin (guant a la fascèna Val de sora): lavala fora insema a la sotebraa, a machina o a man. A la sotebraa tolege fora la veta checena, dant de la meter in smoi. 

L barel (guant a l’antica): MAI te machina da lavèr! Lavalo fora te mingol de èga tebia e saon e sbroscialo ju bel delvers dintornvia l col con n sbrosc da la ombies! Rencuralo te armer canche l é net. Soprescialo DANT de ve l tachèr via, scomenzan da la reversa, co la ponta del fer soprescià con vamp e tirà i bechec, che i vegne bie sospreisc.

L gramièl de laneta o de lèna o seida: no l lavà te l’èga! Vardà de no l cogner lavèr e senó portalo a fèr neteèr! Canche l rencurède tacalo su, soraldut se l é de chi veies. Se l fajede ite coche i fajea zacan l se magna apontin su la faldes e no se podarà più l passèr a la generazion che vegn. Soprescialo fora dant de l meter.

La cordeles ti ciavei e cheles del gramiel: no les lavà te l’èga! Sopresciales dant de les meter o durèr.

L fazolet de seida o lèna: no i lavà te l’èga! Soprescali fora e rodolali te n papier (carta velina) de seida.

La stìnfernes: lavales fora a man te mingol de èga no massa ciauda e saon.

I ciuzé: ence i ciuzé i fèsc pert del guant, vardà de ve trèr ite chi che carenea e nia pócin da ginastica. I ciuzé de pel i va puzene ju ogne outa che se i met.

ClaudiaConta

Encolèr i bechec!

Se i bechec de la ciameija a l’antica o del sciaiter a la fascèna i é mingol da festa e bie lenc ge vel i encolèr che i stae fora mingol bel!

I bechec e la ciameija o del sciaiter da festa i pel esser luré a bechet, a acherle o ence ai feres; più bie i bechec, più bela la ciameija. Te la ciameijes o ti sciaitres manco da festa i era ence de teila de Sèn Gal, chi aló sessaben no ocor i encolèr. La ciameija da mesa festa o da diselaor bendeché à i bechec curc; chisc no ocor i encolèr.

Recordave:

  • Se lavède la ciameija a man, i bechec ve resta dures per n bon trat, se enveze la lavède a machina cognede fèr dutcant danef.

  • Recordave che i bechec vegn bie demò se i siède col ciaut del fer.

  • Se durède vamp, l vamp delega la cola e i no vegn dures.