Ai 9 de otober del 1999 a Poza
En chela dì ge é stat dat n recognosciment a la museghes de Fascia. Da les 9:30 se é peé demez da piaz de Sèn Nicolò con na defilèda con la museghes de Fascia e i gropes de folclor. Da les 10:00 l’é stat endrezà te gejia de la Madona de l’Aiut la messa grana ofizièda da don Pio Casari e la benediscion de la neva bandiera de l’Union di Ladins. Dò messa te tendon de la manifestazions l’é stat fat de curta sonèdes de la museghes, l’é stat portà dant l salut e la relazion del president de l’Union di Ladins de Fascia Antone Pollam e i saluc e i entervenc de la autoritèdes. La marena la é stata endrezèda da les 12:30 te tendon da H.C. Ciadenac. Da les 14:30 l’é stat te tendon l conzert de la museghes de Vich, Moena e Poza e la prejentazion del liber “Museghes de Fascia”. Dò l conzert la festa la é jita inant con musega e legreza per duc.
