L guant da zacan se l met fora per dut l an donca ge vel ge pa meter cura. Chiò dotrei conseies:
La ciameija da om de lin o de bombesc: lavala ogni outa che se la met, ence bel delvers te la machina da lavèr. Se jide bendeché col guant, vardà de n aer does: una che va e una che vegn. La ciameija da om del guant da zacan se la troa ence te la boteiges, jà fata a n bon priesc.
L corpet (brach: corpessot), l gilet per s’intener, sìel pa de velù da fiores o de lèna e seida (Musega Auta Fascia), de seida o de lèna (Museghes e Gropes da Folclor de Fascia): NO l lavà mai, l cognede fèr neteèr. Da n’outa a l’autra lascialo fora a l’aria che ge fèsc ben!
L colet (brach: corpet // talian: giacca): fajé valif che col corpet.
La stìnfernes (moenat: i stìnfes): lavales fora a man te mingol de èga ciauda e polver per la lèna. Salansades ben e stricolales fora te n siaman descheche fajassede per n fianel de lèna.
La braes de pel: NO LES LAVÀ MAI, demò tacales fora a l’aria averta. Se les aede pazes o macèdes, podede troèr dotrei consees extra te chest’autra piata.
La braes de lèna o porghet o pel de diaol (faussa pel): les fèr neteèr.
L zelinder o mez zelinder: lascialo fora a l’aria. Se l é mol fajelo sièr (no a soreie) e vardà che l no perde sia forma. Sincajo volede neteèr n ciapel, fajelo con mingol de èga e ajei e n picol sbrosc dai dents (daite, sun la pèrt che va sul cef). Canche l durède no ve desmentià de empontèr na nègherla checena o n ciof de geranie checen su l’ala.
La peamenta: n segnor se l recognosc da la peamenta neta.
ClaudiaConta