Simon de Giulio, na persona de gran saer
»Simon de Giulio - Inché desche ingern« l é stat l titol del event en recordanza de Simon Soraperra da Penìa, a 110 egn da canche l é nasciù, del 1912. N moment culturèl endrezà en mercol ai 29 de jugn da la sociazion Ensema per Cianacei, Comun de Cianacei e Union di Ladins de Fascia te chino Marmolèda belapontin per recordèr l maor scritor populèr de Fascia.
La scontrèda se à avert col filmat realisà da l’Union di Ladins, un de la lingia di 12 filmac en program per recordèr l scritor, olache la neza Licia Soraperra recorda l leam che l’aea con sie giaf.
Sun paladina i relatores Fabio Chiocchetti e Cesare Poppi che, con la moderazion capaze de Nicoletta Riz, ge à dat ousc ai recorc più fogn e sćiantives de Simon de Giulio, desche na persona de gran saer, n om umol, ma con na certa fineza e ironia.
Nicoletta Riz ensema ai relatores Cesare Poppi e Fabio Chiocchetti.
Duc doi lo à cognosciù al convegn del Istitut cultural ladin del 1976 e dapò ogneun miec te sie setores de enteres o de lurier. Poppi, desche antropologh, ruà te Fascia del ’75 per chierir conties fascènes e dapò del 1979 canche ge é stat domanà de se enteressèr se fossa stat material assà per meter su n museo. »Enlouta eraane vejins de cambra – à dit Cesare Poppi – ajache gio aee troà alberch te la Penscion Negritella de soa femena Nenola e el stajea sun aut. Me recorde che l sentie bater te na machina da scriver, se troaane do l lurier e se la contaane su. L era semper gustegol, desponibol, grignolent e n muie generous, no l aea chela burta calità da inteletual de se tegnir dut per sé, chest lo califichea desche l ultim di inteletuai organics.«
Ma che velel pa dir organich, ge à domanà Nicoletta Riz. Organich – à spiegà Poppi – tel sens che l era n scritor che l stajea anter la jent, che l metea ju che che l vedea e l sentia, che l scrivea coche l rejonèa. N scritor che ge à volù n muie ben a soa jent e soa tera.
Gran scritor de poejies, prosa e mascherèdes
Sun coche l scrivea e de che che l scrivea l é jit più a fon Fabio Chiocchetti. »Simon da zeche ora l se n à adat che la jent no rejonaa più fascian, coscita l se à pissà de scriver el enstes per fascian per lasciar scrit l lengaz, l à orì na strada per duc chi che à volù se n emprevaler de n model linguistich« – à dit Chiocchetti.
Tant te la prosa che te la poejia l à lascià ite na sort de musicalità che ge é stat recognosciù dut intorn e che Fabio Chiocchetti à regoet e metù al luster te la creazion de la musega per sia poejies »Sajons« e »Fior e foa«, chesta ultima no l à nience podù la sentir compida ajache l é mort pech dant che Chiocchetti l la fenesce. La ciantia, portèda dant da I Marascogn, é stata fata scutèr te sala.
Prosa e poejia se à enterzà ti scric de Simon, desche te sia publicazion più cognosciuda »Usanzes e lurgeres da zacan«, n’opera che l à metù ensema dal scomenz a la fin, publichèda dal Istitut Cultural Ladin del 1983, na fontèna de paroles e de esprescions che amò aldidanché vegn recognosciuda.
E co no recordèr l gran contribut che Simon de Giulio à lascià per l Carnascèr fascian, l à scrit 14 mascherèdes te 4 egn, regoetes riches de spirit fascian spilenèdes trop dal Grop de la Mèscres de Dèlba e Penia e dapò l é stat ence un di miores Bufons de Penìa, l se scrivea ju enstes la patofies con fèr pizochent e feruscol.
Simon de Giulio l é stat strumental per meter su l Museo Ladin de Fascia, à recordà i doi relatores, l à soscedà l enteres te la jent da n pont de veduda de la cultura materiala.
En ultima Fabio Chiocchetti à sotlineà l valor del patrimonie linguistich che ne à lascià Simon de Giulio, che é stat digitalisà e che, en pèrt, speta amò de vegnir valorisà e slarià fora, percheche enceben che l rejone del passà l à na emportanza leterèra, morfologica e linguistica che no se pel lascèr te na crigna.
Monica Cigolla